«Altaıdyń» arýlary. Sońǵy úsh-tórt jyldyń kóleminde elimizdegi sport kommentatorlarynyń aýyzdarynan tamsanýǵa toly osy tirkesti jıi estıtin bolyp júrmiz. «Altaıdyń» arýlary dep otyrǵanymyz, Sáken Qalymov shyrqaıtyn «Altaıdyń ar jaǵynan kelgen arý» emes, ózimizdiń, Altaıdyń ber jaǵyndaǵy sportshy arýlarymyz. Naqtyraq aıtsaq, sońǵy úsh jyl qatarynan Qazaqstan chempıony atanyp, qarsylas shaq keltirmeı júrgen «Altay» voleıbol klýbynyń qyzdary.
Qazaqstannyń úsh dúrkin chempıony
Áıelderden jáne erlerden quralǵan «Altay» voleıbol klýby О́skemende 2015 jyldyń kúzinde oblys ákimi Danıal Ahmetovtiń bastamasymen qurylǵan-dy. Bir jaǵynan óńirdegi voleıbol sportyn jańa beleske kóterý, jergilikti sportshylardyń talant kózin ashý, ekinshi jaǵynan Altaı brendin álemge nasıhattaý, pash etý maqsatynda ashylǵan klýb búginde kózdegen mejege batyl qadammen kele jatqanyn eshkim joqqa shyǵara qoımas. «Sol jyly (2015) «Altay»-dyń erler quramasy da, áıelder quramasy da Qazaqstan chempıony bolyp, Shyǵys Qazaqstannyń voleıbol tarıhynda tuńǵysh ret jeńimpaz atandy. Qazirgi ýaqytta «Altay» voleıbol klýbynyń qyzdary elimizdiń úsh dúrkin chempıony. Eki ret Qazaqstan kýbogyn, osynsha márte Sýperkýbokty jeńip aldy. 2017 jyly aımaq basshysynyń uıytqy bolýymen О́skemende alǵash ret klýbtyq Azııa chempıonaty ótti. Onda qyzdarymyz tórtinshi orynnan kórindi. Byltyr Qytaıda jalaýy jelbiregen klýbtyq álem chempıonatynda «Altaıdyń» arýlary dúnıe júziniń tańdaýly komandalarynyń arasynda 5-oryn ıelendi», deıdi «Altay» voleıbol klýbynyń dırektory Marhat Shynybaev.
Sana jáne onyń sińlileri
8 naýryz merekesi qarsańynda altaılyq voleıbol sheberlerimen kezdesip, jattyǵý barysyn kórip, emen-jarqyn áńgime-dúken qurýdy josparlaǵan edik. Alaıda, josparymyz oryndalmady. «Altay» voleıbol klýbynyń qyzdary Qyzyljarǵa jarysqa ketipti. Desek te, jarys arasynda uıaly telefon arqyly baılanysqa shyǵyp, az-kem suhbat alýǵa tyrystyq.
«Altay» qyzdar voleıbol klýbynyń kapıtany, shabýylshy Sana Anarqulovany buryn teledıdardan nemese О́skemende ara-tura ótetin jarystardan kórip, ár soqqysyn quddy ózimiz soqqandaı tamsanyp: «Mine, qazaq qyzy! Bárekeldi! Qalaı-qalaı oınaıdy ózi» dep taqymymyzdy qysyp otyrýshy edik. Rasynda, ol kezde ulttyq quramada únemi kózimizge jalǵyz Sana ǵana túsip, ottaı basylatyn. Qazir Sanany oblys ortalyǵyndaǵy jarystar nemese jattyǵý kezderinde kúnde bolmasa da aıyna bir-eki márte kórip qalamyz. Voleıboldaǵy sińlileriniń sanynyń artyp kele jatqanyn da baıqaımyz. «О́skemendik klýb atynan óner kórsetip jatqanyma úsh jyldaı ýaqyt bolypty. Shyǵysqa úırenip, baýyr basyp qaldym desem de bolady. Kópshilik bizden: «Sizder sońǵy úsh-tórt jylda qarsylas shaq keltirmeı júrsizder. Munyń syry nede?» dep tańǵalyp surap jatady. Men aıtar edim, munyń syry – eń áýeli bizdiń komandanyń tutastyǵynda, bereke-birliginde. Ekinshiden, oblys ákimdigi, sport basqarmasy oıynshylarǵa barlyq jaǵdaıdy jasap otyr. Úshinshiden, álemdik deńgeıdegi voleıbolshylarmen bir komandada oınap jatyrmyz. Munyń da áseri kóp. Tórtinshiden, bapkerler quramy myqty. Osynyń bári bizdiń nátıjeli oıyn órnegin kórsetýimizge yqpalyn tıgizip jatqany anyq», deıdi komanda kóshbasshysy.
Bireý biler, bireý bilmes, «Altay» qyzdar voleıbol klýby «Altay», «Altay 2», «Altay 3» jáne «Altay 4» degen komandalardan quralǵan. Sońǵy ekeýi aldyńǵy ekeýiniń dýbleri, ıaǵnı izbasarlary ekeni aıtpasa da túsinikti shyǵar. Bir qýanarlyǵy, «Altay 2», «Altay 3», «Altay 4» komandalarynda Sananyń sińlileriniń qatarynyń kóbeıip kele jatqandyǵy. Sonyń biri – «Altay 2» komandasynyń shabýylshysy, Semeı qalasynyń týmasy Móldir Jaqsybaeva. «Klýb qataryna qosylǵanyma alty maýsym boldy. Osy ýaqyt aralyǵynda kóp nárseni úırendik. Sheberligimiz shyńdalyp keledi. Ásirese sheteldik voleıbolshylardan talaı dúnıeni úırendik. Olar oıyn kezinde psıhologııalyq turǵydan jaqsy kómek beredi. Birdeńeni durys istemeı jatsań aıtyp túsindiredi. Jalpy, sheteldik sportshylarmen tájirıbe almasqannan utpasaq, utylmaıtynymyz anyq», deıdi ol.
Jarma aýdany Qalbataý aýylynyń týmasy Samal Ibraeva «Altay 3» komandasynda japon bapkeri Shýto Koıchıdiń qaramaǵynda jattyǵady. Samal О́skemendegi sporttaǵy daryndy balalarǵa arnalǵan ınternatqa 8-synypta qabyldanǵan eken. «Bizdiń bas bapkerimizdiń jattyqtyrý máneri ózgeshe. Tańǵy 5 jarymnan bastap jattyqtyrady. Sonyń nátıjesi de shyǵar, kóptegen jetistikterge jetip jatyrmyz. Taılandta ótken 17 jasqa deıingiler arasyndaǵy Azııa chempıonatyna qatystyq. Japonııaǵa baryp, sheberligimizdi shyńdadyq», deıdi boıjetken.
Sheberlikti shyńdaıtyn – shetel oıynshylary
«Altay» qyzdar voleıbol klýbynda sheteldik sportshylardyń óner kórsetetini de belgili. Klýb dırektory Marhat Shynybaev qazirgi ýaqytta «Altay» jáne «Altay 2» komandalarynda álem chempıony Sılvııa Popovıch, Mateıa Ikıch, Ázerbaıjan ulttyq quramasynyń múshesi Natalıa Mammadova men Boıana Radýlovıch sekildi myqty voleıbolshylardyń oınap jatqanyn aıtady. Qyzyljarda jarysta júrgen Boıanamen uıaly telefon arqyly sóıleskenimizde klýb quramyna alynǵanyna ekinshi maýsym bolǵanyn, alǵash О́skemenge kelgen jyly tońyp, birine-birin qabattap, eki kúrteshemen júrgenin, qazir qalaǵa da, seriktes oıynshylarǵa da boı úıretip, tipti komandalastarynyń kópshiligimen dos bolyp ketkenin aıtady. «Komandamyz óte uıymshyl, tatý. Otbasym sııaqty kóremin. О́z Otanyma qysqa ýaqytqa demalysqa barǵan kezde olarmen telefon arqyly jıi habarlasyp turdyq. Men buǵan deıin kóptegen elde oınadym. Biraq ondaǵy komanda múshelerimen mundaı jyly qarym-qatynas bolǵan emes. Altaıdyń aqkóńil qyzdaryn erekshe jaqsy kórip kettim. Osy jaqtan ketken kúnniń ózinde olarmen aralasyp, syılasyp turatynyma esh kúmánim joq. Voleıbol – komandalyq oıyn. Biriń báriń, báriń biriń úshin jan alysyp, jan berisip oınamasań nátıje bolmaıdy. Komandadaǵy eń mańyzdy dúnıe – osy. «Altay» qyzdarynda osy dúnıe bar. Birlik bar, túsinistik bar, yntymaq bar. Biz – bir komandamyz, biz – birtutaspyz», deıdi ol.
Azamat QASYM,
«Egemen Qazaqstan»
О́SKEMEN