Beısenbi, 5 sáýir 2012 7:39
Ingýshetııada jankeshtilerdiń qatysýymen oryn alýy múmkin delingen lańkestik áreketterge tosqaýyl qoıyldy. Respýblıkanyń quqyq qorǵaý organdaryna jergilikti turǵyndardan aqparat kelip túsip, onda «jankeshtilerdiń ózin ózi jarý arqyly birneshe lańkestik aktilerge barýy múmkin» ekendikteri eskertilipti.
Beısenbi, 5 sáýir 2012 7:39
Ingýshetııada jankeshtilerdiń qatysýymen oryn alýy múmkin delingen lańkestik áreketterge tosqaýyl qoıyldy. Respýblıkanyń quqyq qorǵaý organdaryna jergilikti turǵyndardan aqparat kelip túsip, onda «jankeshtilerdiń ózin ózi jarý arqyly birneshe lańkestik aktilerge barýy múmkin» ekendikteri eskertilipti.
Osyǵan oraı, Reseıdiń Federaldy qaýipsizdik keńesiniń jedel quqyq qorǵaý organdary qyzmetkerleri lańkesterdiń kólikteri men olardyń qozǵalý baǵyttaryn anyqtaǵan. Sonyń nátıjesinde 3 sáýir kúni keshki saǵat toǵyz shamasynda respýblıkanyń Federaldy qaýipsizdik keńesi men Ishki ister mınıstrligi qyzmetkerleri Nazran kóshesinde ózderine qarsylyq kórsetken 5 birdeı jankeshtiniń kózin joıǵan.
О́limniń sebebi anyqtalý ústinde
Fransııadaǵy Saıası zertteýler ınstıtýtynyń jetekshisi Rıshar Deskýenniń óli denesi Nıý-Iorktegi qonaq úılerdiń birinde tabylǵan. 53 jastaǵy saıasatker seısenbi kúni tańerteń Kolýmbııa ýnıversıtetinde uıymdastyrylǵan konferensııaǵa qatysýy tıis eken.
Alaıda, ol is-sharaǵa kelmegennen keıin saıasatkerdiń áriptesteriniń ótinishi boıynsha qonaq úı qyzmetkerleri onyń bólmesine kóterilip, Rıshar Deskýenniń óli denesin kórgen. Nıý-Iork polısııasy saıasatker óliminiń kezdeısoq emestigin aıǵaqtap otyr.
Shekaralyq baqylaý kúsheıe me?
Germanııanyń Ishki ister mınıstri Hans-Peter Frıdrıh Shengen kelisimine múshe elderge qatysty shekaralyq baqylaýdy engizý jóninde usynys aıtty.
Frıdrıhtiń pikirinshe, Eýropada shekaralyq baqylaýdy tek aýqymdy is-sharalar, máselen, fýtbol jarystary men saıası kongrester kezinde ǵana engizbeý kerek. Mundaı bastama Shengen aımaǵynyń shekarasynda turǵan elder ózara kelisimdi saqtamaǵan jaǵdaıda jáne zańsyz ımmıgrasııa tolqynyna tosqaýyl qoıý úshin qajet, dep sanaıdy saıasatker. Nemis mınıstri shekaranyń ashyq bolýy birtutas Eýropa úshin úlken mańyzǵa ıe ekendigin, alaıda, qaýipsizdik máselesin de nazardan tys qaldyrmaý qajettigin alǵa tartady.
Úshinshi ret saılaýǵa túspekshi
Serbııa prezıdenti Borıs Tadıch óziniń ókilettiginen merziminen buryn bas tartty. Bul týraly Prezıdent óziniń bılikten bas tartýyn elde 6 mamyrda ótetin kezekten tys prezıdenttik saılaýǵa aldyn ala daıyndyq júrgizýge múmkindik berýimen baılanystyrǵan. Bir aıta keterligi, bul saılaý parlamenttik jáne mýnısıpaldyq saılaýlarmen bir mezette ótetin bolady.
Tadıchtiń ókilettik merzimi tek 10 aıdan keıin ǵana, ıaǵnı 2013 jyldyń 15 aqpanynda aıaqtalýy tıis bolatyn. Jańa saılaýda taǵy da saılaýǵa túsýge nıettenip otyrǵan ol eger de jeńiske jetse, úshinshi ret prezıdenttik ókilettikke ıe bolmaq. Tadıchtiń prezıdenttik saılaýdaǵy basty qarsylasy oppozısııalyq Serbııa progresshil partııasynyń lıderi Tomıslav Nıkolıch bolýy múmkin.
Basqarma bastyǵy paramen ustaldy
Kosovonyń Sybaılas jemqorlyqqa qarsy kúres basqarmasynyń bastyǵy Nazmı Mýstafıge óziniń qyzmettik ókilettigin asyra paıdalandy jáne para aldy degen aıyp taǵylyp otyr.
Memlekettik prokýror Ismet Kabashı Mýstafıge qatysty habarlamada: «Bul oqıǵa Kosovonyń barlyq zań júıesine nuqsan keltirdi», dep málimdelgen. «Mende bul azamattyń qatysýymen bolǵan basqa da osy tektes áreketter jóninde aqparat bar. Arnaıy zertteýler júrgizý úshin taǵy da qosymsha aqparattarǵa ıe azamattardyń bizge habarlaýyn suraımyz», depti Ismet Kabashı. Jergilikti Zeri gazetiniń habarlaýynsha, Mýstafı paralardy deldaldar júıesi arqyly alyp otyrǵan.
Qastandyq áreketine esh ókinbeıdi
2011 jyldyń jazynda Norvegııada 77 adamnyń ómirin qıyp, eki birdeı aýyr lańkestik áreketke barǵan Anders Berıng Breıvık «psıhıkalyq aýrýdan emdelý ólimnen de jaman», degen málimdeme jasady. Bul týraly ol óziniń 38 betten turatyn ashyq hatynda jazǵan.
«Saıası belsendige psıhıkalyq aýrý degen dıagnoz qoıyp, ony emdetý úshin aýrýhanaǵa jiberý – bul baryp turǵan, tipti ony óltirgennen de artyq qatygezdik! Mundaı taǵdyr ólimnen de jaman», dep jazǵan óz hatynda Breıvık. Hatynda lańkes medısınalyq sarapshylardyń ózine jasaǵan qorytyndysyn «jiliktep shaǵyp bergen». Sondaı-aq, ol medısınalyq qorytyndy jasaý kezinde dárigerlerdiń emosııany basshylyqqa alǵandyǵyn, buǵan óziniń asqan qatygezdikpen jasaǵan áreketteri sebep bolǵandyǵyn, al ózinde eshqandaı aýytqýshylyq joq ekendigin málimdegen. Breıvık óziniń qastandyq is-áreketin «Eýropany ıslamdanýdan qutqarý úshin jasadym» dep túsindirýde kórinedi.
Talabyn eskermeı tastady
Halyqaralyq qylmystyq sot Palestına avtonomııasynyń Izraılge qatysty talabyn qaraýdan bas tartty. 2011 jyldyń shilde aıynda Palestına ulttyq avtonomııasy jetekshileri Halyqaralyq qylmystyq sottan Izraıldiń qarýly kúshteriniń jasaǵan áskerı qylmystaryna zertteý júrgizýdi talap etken bolatyn.
Palestına basshylarynyń pikirinshe, bul qylmystar 2008-2009 jyldary Gaza sektorynda oryn alǵan. Alaıda, Halyqaralyq qylmystyq sot bul talaptyń eskerilmeýin Palestına ulttyq avtonomııasynyń ázirge BUU-nyń tolyqqandy múshesi emestigimen, sáıkesinshe, Halyqaralyq qylmystyq sottyń ıýrısdıksııasy Palestına jerinde taratylmaıtyndyǵymen túsindirgen.
Internet materıaldary negizinde ázirlendi.