QR Premer-Mınıstri Asqar Mamınniń tóraǵalyǵymen ótken Úkimettiń kezekti otyrysynda 2019–2023 jyldarǵa Qazaqstannyń áleýmettik-ekonomıkalyq damýy jáne 2019–2021 jyldarǵa arnalǵan respýblıkalyq bıýdjet boljamyn naqtylaý máseleleri qaraldy. Bul týraly Premer-Mınıstrdiń baspasóz qyzmeti habarlady.
Negizi makrokórsetkishter men bıýdjettik parametrlerdiń boljamdary týraly Premer-Mınıstrdiń birinshi orynbasary – Qarjy mınıstri Á. Smaıylov jáne Ulttyq ekonomıka mınıstri R. Dálenov baıandady.
Ulttyq ekonomıka mınıstrliginiń derekteri boıynsha, 2019 jylǵa arnalǵan makrokórsetkishterdiń boljamyn naqtylaýdyń negizgi faktorlary — 2018 jylǵa Jalpy ishki ónim dereginiń jarııalanýy, taý-ken ónerkásibi men qyzmet kórsetý sektorynyń ósý qarqynynyń ózgerisi.
«2018 jyly JIО́ kólemi 58,8 trln teńgeni qurady. Bul 2019 jyldy baǵalaý úshin jaqsy baza bolyp sanalady. 2018 jylmen salystyrǵanda munaı óndirý 1,4 mln tonnaǵa nemese 1,5%-ǵa tómendeıdi. Bul taý-ken ónerkásibiniń tómenirek ósý qarqynyn qalyptastyrady. Alaıda qyzmet kórsetý sektory boıynsha neǵurlym joǵary ósim kútilip otyr. Qyzmet kórsetý sektory ósiminiń negizi – ishki suranystyń ulǵaıýy», — dep málimdedi R. Dálenov.
Syrtqy jáne ishki faktorlardy eskere otyryp, Boljam aıasynda 2019 jylǵa arnalǵan bazalyq parametrler buryn maquldanǵan deńgeıde saqtaldy:
munaı baǵasy — bir barreline $55; teńge baǵamy — bir AQSh dollary úshin 370 teńge; jyldyq ınflıasııanyń nysanaly dálizi — 4-6%.Túzetilgen makroekonomıkalyq boljam negizinde Elbasynyń jańa áleýmettik bastamalaryn iske asyrýdy, sonymen qatar Qazaqstan halqyna arnalǵan Joldaýdy jáne «Nur Otan» partııasynyń XVIII sezinde berilgen tapsyrmalardy oryndaýdy qarjylyq qamsyzdandyrý úshin 2019 jylǵa arnalǵan bıýdjet parametrleriniń boljamy naqtylandy.
Premer-Mınıstrdiń birinshi orynbasary – Qarjy mınıstri Á. Smaıylov naqtylanǵan respýblıkalyq bıýdjettiń jobasy ázirlengenin aıtty.
«Alda turǵan basty maqsattardyń biri – birinshiden, ol osy naqtylanǵan respýblıkalyq bıýdjettiń jobasyn Parlamentke engizý jáne onyń qabyldanýyn qamtamasyz etý. Ekinshiden, naqtylanǵan bıýdjette kózdelgen tólemderdiń ýaqytynda alýshylarǵa jetýin qamtamasyz etý úshin, barlyq bıýdjettik prosedýralardy tez arada ótkizý. Úshinshiden, bıýdjet kiristeriniń tolyq oryndalýyn qadaǵalaý jáne bıýdjet qarajatynyń atqarylýyna onlaın-monıtorıngti jalǵastyrý», — dedi Á. Smaıylov.
Naqtylanǵan bıýdjet jobasy qarajattardyń 3 baǵyt boıynsha bólinýin qarastyrady.
Birinshisi. Elbasynyń «Nur Otan» partııasynyń XVIII sezinde ataǵan «Áleýmettik qamqorlyq» áleýmettik sharalaryn jalpy somasy 444,3 mlrd tg iske asyrý.
«Atalǵan qarajattar aıasynda azamattardyń jekelegen sanattaryna áleýmettik qoldaýdy kúsheıtý kózdelgen, onyń ishinde tómen jalaqy alatyn jumysshylardyń eńbek aqysyn, múgedektigi boıynsha járdemaqylardy ulǵaıtý, ataýly áleýmettik kómek taǵaıyndaý parametrlerin ózgertý, az qamtylǵan kópbalaly otbasylarǵa jaldamaly turǵyn úı salý jáne QTQJB arqyly jeńildikti nesıelendirýdi engizý, sondaı-aq óńirlik ınfraqurylym men "Aýyl – El besigi" arnaıy jobasyn damytý», — dedi Á. Smaıylov.
Ekinshisi. «Jastar jylyn» ótkizý aıasynda is-sharalardy iske asyrý — 24,6 mlrd tg.
Úshinshisi. Prezıdenttiń 2017 jáne 2018 jyldardaǵy joldaýlarda aıtylǵan tapsyrmalaryn oryndaý — 286 mlrd tg.
Qarjy mınıstri atalǵan qarajattar aıasynda Túrkistan oblysyn jáne Astana qalasyn damytýdyń keshendi josparlaryn iske asyrý, Astanada Ǵylymı-onkologııalyq ortalyq, «Saryarqa» gaz qubyryn salý, sondaı-aq, elimizdiń qaýipsizdigin qamtamasyz etýge qatysty is-sharalardy iske asyrý kózdelgenin atap ótti.