Jetisýdyń kásipkerleri arasynda jaqsy úrdis bastaldy. Áleýmet aldyndaǵy jaýapkershiliginen jaltarmaı, árdaıym qaıyrym kórsetip kele jatqan qaltaly azamattar endi kóp balaly otıbasylar men jalǵyz basty analarǵa baspana satyp alyp berip jatyr.
Jetisýdaǵy «jaqsylyq jasaý jarysynyń» tizginin qoldaryn alǵan Kerbulaq aýdanynyń kásipkerleri bas-aıaǵy eki-úsh kún ishinde 3 otbasyna úı syılap, qýanyshqa keneltti. Mysalǵa. Saryózek aýylynda ornalasqan «Alasem» zaýytynyń bas dırektory Stanıslav Sherbakov áleýmettik jaǵdaıy tómen otbasy sanatyndaǵy jalǵyz basty ana Jumaǵyz Medetovaǵa turǵyn úıdiń kiltin tabystady.
- 2013 jyldan beri úsh balamen úısiz páterden páterge kóship júrmin. Balalarym oqýshy, tapqan tabysym olardyń kıimi men tamaǵynan artylmaıdy. Endi, mine, ózimizdiń shańyraǵymyz bar. Azamattarǵa rahmet, - deıdi qýanyshtan kózine jas alǵan Jumaǵyz Medetova.
Al osy aýdannyń Qoǵaly aýylynda turatyn jeke kásipker, máslıhat depýtaty Qaırat Bekıev te jaqsylyq úrdisine úles qosyp, aýyldasy, alty balanyń anasyn Aıgúl Eshpaevaǵa záýlim úı tartý etti.
- Meıirimdilik - adam boıyndaǵy eń izgi qasıetterdiń biri. Ana-ómirdegi eń úlken qurmetke laıyq adam. Sondyqtan da, kóp balany dúnıege ákelip, ultymyzdyń kóbeıýine úlken úles qosyp júrgen analarǵa qýanysh syılaý- biz úshin úlken baqyt, - deıdi kásipker Qaırat Bekıev.
Dál osyndaı qýanyshqa Taldybulaq aýylyndaǵy kóp balaly ana Nadejda Lemeshko da keneldi. 6 balalasy bar otbasyǵa taldybulaqtyq isker azamat Kalen Tursynbaev óz qarjysyna baspana satyp alyp berdi.
Sondaı-aq osy aýdandaǵy Qaspan aýylynyń kásipkerleri Slambaı Toqabaev jáne Vıtalıı Tarasenko 11 balanyń anasy Gúlnaz Shakenova men áleýmettik jaǵdaıy tómen 3 balaly otbasyn qajetti azyq-túlikpen qamtamasyz etti.
Qalmahanbet MUQAMETQALI,
«Egemen Qazaqstan»
Almaty oblysy