Seısenbi, 7 tamyz 2012 7:49
Izraıl men Egıpet shekarasynda 16 egıpettik áskerı qyzmetshiniń qaza bolýyna soqtyrǵan terakt álemdik BAQ-tar nazaryn ózine aýdaryp otyr.
Seısenbi, 7 tamyz 2012 7:49
Izraıl men Egıpet shekarasynda 16 egıpettik áskerı qyzmetshiniń qaza bolýyna soqtyrǵan terakt álemdik BAQ-tar nazaryn ózine aýdaryp otyr.
Terakt bolysymen-aq Egıpet prezıdenti Mohammed Mýrsı áskerı basshylyqpen jáne arnaıy qyzmetter basshylarymen shuǵyl keńes ótkizip, terakt jasaýshylardyń aıaýsyz jazalanatynyn málimdedi. Osy rette áskerı kıim kıgen lańkesterdiń Egıpet armııasynyń Gaza sektorymen shekaradaǵy blokpostqa shabýyl jasaǵanyn, keıbir sodyrlardyń aldyn-ala bazaǵa enip ketkenin aıta ketý qajet. Halyqaralyq jańalyq agenttikteri shabýyl jasaýshylardyń artynda Sınaı jarty aralyndaǵy terrorshylar men palestınalyq sodyrlardyń turǵanyn habarlaýda.
«Kıýrıosıtı» Marstan fotosýretter jiberdi
AQSh prezıdenti Barak Obama «Kıýrıosıtı» avtomatty apparatynyń Marstyń ústine tabysty qonýyna baılanysty NASA-ny quttyqtady.
NASA mamandarynyń aıtýynsha, apparat Marstyń ústine meılinshe dáldikpen qonǵan. Mamandar qazirdiń ózinde planetanyń ústinen birneshe fotosýretter alǵan kórinedi. Marsqa deıingi joldyń 8 aıdan astam ýaqytqa sozylǵanyn atap ótý qajet. Osy merzim aralyǵynda apparat shamamen 570 mln. shaqyrymdaı qashyqtyqty ushyp ótken. Apparattyń quny da óte qymbat, ol shamamen 2,5 mlrd. dollar turady. Bul amerıkalyqtardyń Qyzyl planetany ıgerý tarıhyndaǵy eń qymbat mıssııa bolyp tabylady eken.
Úkimet áskeri sheshýshi shabýylǵa daıyndalýda
Sırııanyń memlekettik teledıdary el áskeri «jaldamaly terrorshylardy» Aleppo qalasynda óte úlken shyǵyndarǵa ushyratty dep habarlaýda.
Eldiń ekonomıkalyq astanasy sanalatyn Aleppoda qazir óte aýyr shaıqastar júrýde. Áskerı málimetterge qaraǵanda, ereýilshilerge qarsy keń kólemdi shabýyl jasaýshy úkimet áskerleriniń sany 20 myńǵa jetken kórinedi. Ereýilshiler de óz kezeginde eleýli shabýylǵa shyǵýǵa daıyn ekendikterin málimdeýde. Buǵan deıin Sırııa armııasy ereýilshilerdi olar osy ýaqytqa deıin qolda ustap kelgen Damaskiniń sońǵy aýdanynan yǵystyryp shyǵarǵanyn habarlaǵan bolatyn. Úkimet áskerleri artıllerııany paıdalanyp, ereýilshilerdi ushaqtarmen jáne tikushaqtarmen shabýyldaýda.
Ishki terrorızm retinde tanyldy
AQSh polısııasy sıkhter hramynda oryn alǵan qandy qyrǵyndy «ishki terrorızm» jaǵdaıy retinde tergeıtinin habarlaǵan.
Qazirgi ýaqytta Vıskonsın shtatynda bolǵan oqıǵanyń naqty jaǵdaılary aıqyndala bastady. Belgisiz bireý dinı rásim ótip jatqan shaqta Oek Krık qalasyndaǵy sıkhter hramyna basyp kirgen. Terrorshynyń betaldy atqan oǵynan 6 adam qaza tapty. Qylmys jasalǵan orynǵa polısııa kelgen kezde qylmyskerge quqyq qorǵaýshynyń birin jaralaýdyń sáti túsken kórinedi. Biraq onyń serigi sol jerde terrorshynyń kózin joıǵan. Sıkhter qoǵamdastyǵynda qanisher óz ortamyzdan shyqqan joq pa degen úreı de bar.
Iran prezıdentin
Mekkege shaqyrdy
Saýd Arabııasynyń koroli Abdalla II Iran prezıdenti Mahmýd Ahmadınejadty tamyz aıynyń ortasynda bolatyn tótenshe ıslam sammıtine qatysýǵa shaqyrdy.
Islam yntymaqtastyǵy uıymyna múshe 57 memleket basshylary qatysatyn tótenshe sammıt Mekkede 14-15 tamyzda ótedi. Forýmnyń maqsaty, Saýd Arabııasy syrtqy ister mınıstri Saýd ál-Feısaldyń aıtýynsha, jikke bóliný qaýpi tónip turǵan qazirgideı kúrdeli ýaqytta ıslam álemniń birligin taǵy bir aıǵaqtaý. Soǵan baılanysty uıymdastyrýshylar úshin sammıtke osyǵan deıin qarym-qatynastar tym kúrdeli bolyp kelgen Tehran ókiliniń qatysýy óte mańyzdy bolyp tabylady.
Hırosıma qasiretiniń 67 jyldyǵy atap ótildi
Japonııada Amerıkanyń Hırosıma qalasyna atom bombasyn tastaǵanyna 67 jyl tolýy atalyp ótýde.
Qalalyq Beıbitshilik saıabaǵynda ótken memorıaldyq rásimge eldiń premer-mınıstri Esıhıko Noda qatysqan. Obelıskiniń ishine atom bombasynyń qurbany bolǵan 280.959 adamnyń attary jazylǵan jańa tizim qoıylǵan. Qurbandar qataryna sońǵy bir jylda qosylǵandar sany 5729 adamdy qurap otyr. Hırosıma qalasynyń meri óz sózinde «Fýkýsımada» bolǵan apatqa da toqtalyp ótken. Sonymen birge, ol ózge elderdi de álemdi ıadrolyq qarýdan azat etý jónindegi Hırosıma men Nagasakı turǵyndarynyń tilegine qosylýǵa shaqyrdy.
Kýrd sodyrlary shabýyl jasady
Túrkııanyń ońtústik-shyǵysynda túrik áskerleri men kýrd sodyrlary arasynda bolǵan qaqtyǵystan 19 adam qaza tapqan.
«Bostandyq» radıostansasynyń habarlaýynsha, urys kýrd ereýilshileriniń bir toby Irakpen shekaradaǵy eldi mekenderdiń birindegi áskerı beketke shabýyl jasaǵannan keıin bastalǵan. Qaza bolǵandardyń arasynda 6 túrik soldaty, 2 jergilikti turǵyn jáne 11 kýrd sodyrlary bar kórinedi. Onyń syrtynda túriktiń 15 áskerı qyzmetshisi túrli dene jaraqattaryn alǵan. Osydan 2 apta buryn atalǵan provınsııada túrik armııasy Kýrd jumysshy partııasynyń sodyrlaryna qarsy iri áskerı operasııa ótkizgen bolatyn. Sóz retinde Kýrd jumysshy partııasyn AQSh pen Eýroodaqtyń terrorlyq uıym dep tanıtynyn da aıta ketý qajet.
Internet materıaldary negizinde ázirlendi.