Astana qalasyndaǵy ulttyq mýzeıde «Irak ashyq aspan astynda: Qazaqstan jáne Polsha bitimger áskerleri» dep atalatyn halyqaralyq kóshpeli fotokórme ashyldy.
Sharany uıymdastyrýshylar – Qorǵanys mınıstrligi jáne «Qazbat» bitimgerler jasaǵynyń quramynda qyzmet atqaryp júrip, 2005 jyldyń 9 qańtarynda Irak jerinde jarylǵan mına saldarynan qaıtys bolǵan bitimger-kapıtan Qaırat Qudabaev atyndaǵy qoǵamdyq qor men elimizdegi Polsha Respýblıkasy Elshiliginiń qorǵanys isteri jónindegi attashesi.
Kórmeniń saltanatty ashylý rásimine bitimgerlik mıssııanyń ardageri, Polsha Respýblıkasynyń zapastaǵy brıgada generaly Gjegoj Býshka jáne Qorǵanys mınıstriniń orynbasary general-maıor Múslım Altynbaev qatysyp, ótkenge salaýat, bolashaqqa bereket tilep, sóz sóıledi. Bul tulǵalardyń aıtýyna qaraǵanda, Qazaqstan men Polsha bitimgerleri bir-birimen ıyq tirestire júrip Irakta beıbit ómir qalyptastyrýǵa atsalysypty.
Iаǵnı, Iraktaǵy mıssııa kezinde 300-ge tarta qazaqstandyq bitimger-jaýyngerler «Qazbat» ınjenerlik-saperlik otrıad quramynda 10 ret rotasııaǵa qatysyp, dalalyq pýnktterdi aýyz sýmen qamtyp, jarylmaı qalǵan mınalardy zalalsyzdandyrǵan. Sonymen qatar jarylý qaýpi bar núktelerdiń kózin joıyp, Irak áskerı akademııasynyń 572 kýrsantyn saper isine mashyqtanǵan.
Kórmege joǵarydaǵy áskerı mindetterdi atqarý kezinde túsirilgen qazaqstandyq bitimgerlerdiń 50-den astam fotosy qoıyldy.
Shara kezinde Polsha Respýblıkasynyń ulttyq qaýipsizdik bıýrosy áskerı qolbasshylyǵy departamentiniń dırektory, brıgada generaly Iаroslav Krashevskı men Qazaqstan Respýblıkasynyń Polshadaǵy Tótenshe jáne О́kiletti Elshisi Marǵulan Baqytuly tikeleı efırge shyǵyp, atalmysh fotokórme aldaǵy 25 mamyrda Varshava qalasyndaǵy «Polsha Voıskosy» mýzeıinde jalǵasatynyn jetkizdi.
Beken QAIRATULY,
«Egemen Qazaqstan»