Aqtaýda Mańǵystaý oblysynyń ákimi Eraly Toǵjanov, Atyraý oblysynyń ákimi Nurlan Noǵaev jáne Soltústik-Kaspıı Konsorsıýmynyń ókilderi - Konsorsıým aksıonerleri keńesiniń tóraǵasy Lýka Vınetı, NCOC kompanııasynyń basqarýshy dırektory Rıchard Hoývtyń qatysýymen úsh jaqty kezdesý ótti.
Jıyn barysynda atalmysh kompanııa ókilderi áleýmettik baǵdarlamalardyń aıasynda eki oblystyń áleýmettik-ekonomıkalyq damýyna ınvestısııalardy jalǵastyrýǵa sheshim qabyldady.
- Mańǵystaý jáne Atyraý oblysytranyń áleýmettik-ekonomıkalyq damýyn ınvestısııalaý týraly qoldanystaǵy kelisimniń merzimi osy jyly aıaqtalady. Alaıda, 2020-2022 jyldar aralyǵynda Soltústik Kaspıı Konsorsıýmy ózi qyzmetin júzege asyratyn aımaqtardyń damýyna jyl saıyn 50 mıllıon AQSh dollar kóleminde qarajat bóletin bolady, dedi Konsorsıým aksıonerleri komıtetiniń tóraǵasy Lýka Vınıatı. Bul oraıda, Atyraý jáne Mańǵystaý oblystarynyń áleýmettik-ekonomıkalyq damýyna bólinetin qarajattyń jalpy somasy 150 mıllıon AQSh dollar. Sonymen qatar, Vınıatı myrza Konsorsıým atalǵan somanyń qomaqty bóligi bilim berý salasyndaǵy jobalardy damytýǵa jumsalatynyna úmittenetindigin jetkizdi. Qazirgi ýaqytta Konsorsıým aksıonerleri О́kiletti Organ – «PSA» JShS-symen tıisti kelisimder boıynsha birlesip jumys isteý týraly sheshim qabyldady.
- Soltústik Kaspıı jobasy tikeleı sheteldik ınvestısııalardy tartý turǵysynda Qazaqstan Respýblıkasyndaǵy eń iri joba bolyp esepteledi. Bul joba Qazaqstan azamattaryn jumyspen qamtyp, jergilikti kompanııalardy jumysqa tartý arqyly ekonomıkaǵa aıtarlyqtaı úles qosýda. Sońǵy 20 jyl ishinde «NKOK» kompanııasy Atyraý jáne Mańǵystaý oblystarynda 200-den astam áleýmettik jáne ınfraqurylymdyq jobany júzege asyrdy. Osy jobalarǵa jumsalǵan qarajattyń jalpy somasy 620 mıllıon AQSh dollarynan asty. 2018 jyly Soltústik Kaspıı jobasy aıasynda jergilikti taýarlarǵa, jumystarǵa jáne qyzmetterge 420 mıllıon AQSh dollarynan astam qarajat kólemi jumsaldy, bul bizdiń jalpy shyǵyndarymyzdyń 43%-ten astamyn qurady. «NKOK» kompanııasy tarapynan 2004 jyldan beri jergilikti taýarlarǵa, jumystarǵa jáne qyzmetterge jumsalǵan qarajattyń jalpy somasy 14 mıllıard AQSh dollarynan asty, dep atap ótti «NKOK N.V.» kompanııasynyń basqarýshy dırektory Hoýv myrza. Sondaı-aq, Rıchard Hoýv Qashaǵan ken ornynyń Qazaqstan ekonomıkasyna qosatyn úlesi ondaǵan jyldarǵa sozylatyn ıgerý jobasynyń aıasyndaǵy paıdalaný kezeńi barysynda júzege asyrylatynyn atap aıtty.
- Sońǵy birneshe jyl ishinde Soltústik Kaspıı Konsorsıýmy Mańǵystaý oblysyndaǵy eń iri nysandardyń qurylysyna qatysty. Máselen, Aqtaýda «Mańǵystaý arena» sport kesheni, «Dostyq úıi» salyndy. Qazir NKOK-nyń tikeleı qatysýymen boks ortalyǵy, Ábish Kekilbaev atyndaǵy mádenı ortalyǵy, onkologııalyq ortalyq jáne basqa da áleýmettik mańyzy bar nysandardyń qurylysy júrip jatyr. Yntymaqtastyqtyń barlyq kezeńinde kompanııa aımaqtaǵy kóptegen áleýmettik jáne ınfraqurylymdyq jobalardy iske asyrdy, degen Mańǵystaý oblysynyń ákimi E.Toǵjanov kompanııa ókilderine Mańǵystaý óńiriniń áleýmettik-ekonomıkalyq damýyna qosqan úlesi úshin alǵys bildirdi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy