Astanadaǵy «Kórme» ortalyǵynda Aýyl sharýashylyǵy mınıstrligi, Astana qalasynyń ákimdigi, «QazAgro» ulttyq basqarýshy holdıngi, Qazaqstannyń fermerler odaǵy, Qus ósirýshiler odaǵy, Jylyjaı sharýashylyqtary odaǵy sekildi uıymdardyń tize qosyp qoldaýymen halyqaralyq «AgriTek/FarmTek Astana-2019» aýylsharýashylyq kórmesi ótti.
Eki kúnge sozylǵan kórmege Aýstrııa, Belarýs, Germanııa, Izraıl, Ispanııa, Italııa, Kanada, Qytaı, Nıderland, Reseı, Slovakııa, Túrkııa, Ýkraına, Chehııa, AQSh syndy elderden kelgen 200-den astam kompanııa, sondaı-aq Qazaqstan kompanııalary qatysyp, óz ónimderi men jańa tehnologııalaryn, aýyl sharýashylyǵy salasyndaǵy sońǵy jetistikterin usyndy. Joǵary sapaly aýyl sharýashylyǵy tehnıkalary, egin sýarý, jemshóp óndirý, mal men qus ósirý tehnologııalary salasyndaǵy sońǵy jańalyqtar bıyl da kórmeden oryn aldy.
– Elbasymyz atap kórsetkendeı, aýyl sharýashylyǵy el ekonomıkasynyń mańyzdy salasy retinde onyń áleýetin arttyratyn qozǵaýshy kúshke aınalýǵa tıis. Oǵan qol jetkizýde mundaı arnaýly kórmelerdiń fermerlerge, aýyl sharýashylyǵy ónimderin óndirýshiler men óńdeýshilerge beretin paıdasy zor. Kórmege kelýshiler osynda qoıylǵan tehnıkalarmen jáne tehnologııalarmen tanysa otyryp, aldyńǵy qatarly elderdiń, sondaı-aq óz elimizdiń úzdik kompanııalarynyń qandaı jetistikterge jetip jatqanyn baıqap, ózinshe túıin túıedi. О́z sharýashylyqtarynda sondaı tehnologııalardy engizýge umtylady. Máselen, men ózim kórmeni aralaı júrip, munda sońǵy kezderi fermerlerdiń nazaryna iligip otyrǵan dálme-dál eginshilik tehnologııalarynyń qoıylǵanyn kórdim. Sondaı tehnologııalardy usynǵan kompanııalarmen engizý joldaryn talqylap, osy jerde kelisimshartqa otyrýǵa bolady, – deıdi elimizdiń Aýyl sharýashylyǵy mınıstrligi О́simdik sharýashylyǵy ónimderin qaıta óńdeý departamenti dırektorynyń orynbasary Akbar Máýlenov.
«Kórme» ortalyǵynyń dırektory Gennadıı Dıakınniń aıtýynsha, osy ótip jatqan aýylsharýashylyq tehnıkalary men tehnologııalary kórmesiniń bir ereksheligi, kórme kóleminiń burynǵyǵa qaraǵanda edáýir ulǵaıa túsýi bolyp otyr. Ol «Kórme» ortalyǵynyń bes birdeı zalyn qamtyǵan. Sondaı-aq iri tehnıkalar «Kórme» ortalyǵy ǵımaratynyń mańaıyna shoǵyrlandyrylǵan. Demek, osymen 14-inshi ret ótkizilip otyrǵan kórmege qatysýshy kompanııalardyń yqylasy arta túsken.
– Bul jolǵy kórmeniń taǵy bir ereksheligi, buryn kóbinese jańa tehnıkalarǵa ǵana mán berilýshi edi. Al bul joly eginshilik salasyndaǵy tuqymdar men tyńaıtqyshtar, jylyjaılar ishine ornatylatyn sýarý quraldary, veterınarııa salasyndaǵy sońǵy jetistikterdi áıgileıtin tehnologııalar men quraldarǵa da mán berilýde. О́ıtkeni osynyń barlyǵy fermerlerge kerek. Ekinshiden, bul elimizdiń aýyl sharýashylyǵynyń tıimdilik pen sapaǵa qaraı bet alǵanyn kórsetedi, – deıdi G.Dıakın.
Rasynda bıylǵy kórmeni aralap kórgen adamnyń saladaǵy sońǵy jańalyqtarǵa qyzyǵýshylyǵy arta túsedi. О́ıtkeni kórmege qarap, álemdik aýyl sharýashylyǵy salasynyń jyldan-jylǵa ózgeriske túsip jatqanyn, jańa tehnıkalar men tehnologııalardyń dendep ene bastaǵanyn baıqaýǵa bolady.
Suńǵat ÁLIPBAI,
«Egemen Qazaqstan»