Short-trekten Astanada ótip jatqan Qazaqstan birinshiligine ulttyq qurama kóshbasshylarynyń biri Nurbergen Jumaǵazıev te qatysýda. Eki birdeı Olımpıada oıyndarynyń dýyn kórgen talantty sportshy jyldyń sońǵy resmı jarysynda bıylǵy maýsymǵa baǵa berip, qaı jerden qatelik jibergenin aıtty dep jazady Olympic.kz.
- Jaqynda álem chempıonatynan oralǵanymyzdy bilesizder. О́kinishke qaraı, álemdik doda men úshin de, komanda úshin de aıtarlyqtaı sátti bolǵan joq. Chempıonat aldyndaǵy oqý-jattyǵý jıynynda jaraqatym mazalady. Munyń da tıgizgen áseri bar. 500 metrde penaltı alyp, jarystan shettetildim. Al 1500 metrde kóńil kónshiterlikteı nátıje bolǵan joq. Jalpy alǵanda, maýsym tartysqa toly boldy. Álem kýbogi kezeńderiniń ózi úlken sabaq. Endi, mine, Astanaǵa jınalyp, el birinshiligin ótkizýdemiz. Qazaqstan chempıonaty aıaqtalǵan soń 20 kúndeı demalys alamyz. Otbasym jáne balalarymmen qaýyshatyn kúndi saǵynyp júrmin, - deıdi sportshy.
Jumaǵazıevtiń aıtýynsha, short-trekshiler úshin demalys uzaqqa sozylmaıdy. Sanaýly kúnnen soń komanda qaıta jınalyp, oqý-jattyǵý jıyndaryna kirisedi.
- Demalys aıaqtalǵan soń Reseı quramasymen birlesken oqý-jattyǵý jıyndary bastalady. Dástúr boıynsha álem kýbogi kezeńderi men álem chempıonatyna daıyndalamyz. Bizdiń sportta Olımpıada oıyndaryna irikteý syny áldeqaıda erte bastalady. Sol sebepti, tezirek jınalyp, joldama ıelenýge tyrysý kerek. 1500 metrde úzdik 32 sportshyǵa, 500 metrde 28 sportshyǵa lısenzııa beriledi. Eń qıyny – estafetadan joldama alý. Munda 8 komanda ǵana Olımpıadaǵa qatysa alady. Bir-birimen ıyq tirestirgen úzdikter ishinen sýyrylyp shyǵý qıyn. Degenmen, bizge osy qıyndyqty artqa tastaý qajet. Osyndaı tartysqa daıyn bolý úshin maýsymdy erterek bastaımyz, - deıdi short-trekshi.
Komanda úzdikteriniń biri quramanyń jas sportshylarymen tolyqqanyna qýanyshty. Talantty jastarmen birge estafetadan Olımpıada oıyndaryna joldama alý múmkindigi arta túspek.
- Bizdiń komanda estafetadan jaqsy nátıje kórsete alady. Muny ózimiz de bilemiz, sheteldikter de bizdiń myqty ekenimizdi aıtady. Biraq únemi birdeńe jetispeı turatyndaı kórinedi. Keıde qulap qalamyz, keıde jarystan shettetedi. Estafetadan álem chempıonatyna qatysa almaı qaldyq. Endi osy olqylyqtyń ornyn toltyrýǵa mindettimiz. Short-trektegi estafeta básekesi tartysqa jáne kútpegen nátıjelerge toly. Máselen, 2018 jylǵy Olımpıada oıyndaryna irikteý kezeńinde vengrııalyqtar 8-shi orynǵa taban tirep, joldamaǵa áýpirimdep júrip qol jetkizdi. Alaıda, Olımpıada chempıony ataǵyn tap solar ıelenip ketti. Sol sekildi, bıylǵy maýsymda Ońtústik Koreıa sportshylary dál osyndaı nátıje kórsetti. Demek, bizge de óz áleýetimizdi kórsetetin kez jetti. Bapkerlermen aqyldasyp, jaqsy kórsetkishmen qýantýǵa tyrysamyz, - dedi Nurbergen Jumaǵazıev.