Kópbalaly otbasylar jańa memlekettik baǵdarlama aıasynda qoljetimdi baspana ala alady. Úkimet alańynda ótken baspasóz konferensııasynda «Qazaqstannyń Turǵyn úı qurylys jınaq banki» AQ tóraıymy Lázzat Ibragımova jekemenshik turǵyn úı satyp alýdyń belgileri men sharttary týraly aıtyp berdi. Bul týraly Premer-Mınıstrdiń baspasóz qyzmeti habarlady.
L. Ibragımovanyń aıtýynsha, kópbalaly otbasylardy muqııat taldaý otbasylardyń tabystary eń tómengi jáne joǵary jalaqy aralyǵynda túrlenetinin kórsetti. Jalpy, Elbasy tapsyrmasy boıynsha jyl saıyn 100 mlrd teńge bólindi. Birinshi sanat — ataýly áleýmettik kómek alatyn otbasylar, olar memlekettiń resýrstaryna ómir súredi, kiristeri óte tómen. Olarǵa satyp alý quqyǵynsyz arendalyq turǵyn úı beriledi.
«Bıyl kóp balaly otbasylardyń turǵyn úı salynyp bitkenshe kútpeýi úshin, úderisti jedeldetýge 50 mlrd tg bólindi. Onyń ishinde 25 mlrd tg qurylysqa, 25 mlrd tg daıyn baspanany satyp alýǵa jáne jekeleı 50 mlrd tg turǵyn úı jınaq bankine bólinedi», — dedi L. Ibragımova.
Basqarma tóraıymynyń aıtýynsha, TQJB mindeti — otbasynyń bir múshesine tabysy 20 000 – 42 500 tg quraıtyn, tólem qabileti bar azamattardy qamtamasyz etý.
«Máselen, 4 balasy bar jáne ata-analarynyń tabysy shamamen 260 myń teńgeni quraıtyn otbasyny alyp qaraıyq. Olar bizdiń baǵdarlamaǵa saı keledi. Olardyń mólsherlemesi jylyna 2%, bastapqy jarnasy 10% bolady, sonymen qatar, ákimdikter bastapqy jarnaǵa qarajattary joq otbasylarǵa kómek kórsete alady, ıaǵnı turǵyn úı sertıfıkatyn berý múmkindigi qarastyrylǵan. Atalǵan baǵdarlamany matematıkalyq ári ekonomıkalyq turǵydan modeldegen kezde, azamattardyń qazir jaldap turatyn úılerine tólep júrgen somalaryna sáıkestendirýge tyrystyq. О́ıtkeni, búginde kóp balaly otbasylar qalalardyń shetkeri aımaqtarynda, ýaqytsha turaq-jaılarda páterlerdi jaldap turady. Sol sebepti de, 8 mln teńge somasynda tólem bastapqy 8 jylda 42 myń tg quraıtyn bolady, bul shaǵyn jataqhanaǵa tóleıtin somamen birdeı deýge bolady. Al odan keıingi 10 jylda 27 myń tg quraıdy», — dep túsindirdi L. Ibragımova.
Buǵan qosa, baǵdarlama arqyly jańa úıdi de, qaıtalama turǵyn úıdi de alýǵa bolady.
«Maqsat – baspanamen qamtamasyz etý, bul árbir otbasynyń tólem qabiletine baılanysty bolmaq. Bizde páter kólemi, aýdany boıynsha shekteý joq, shekteý tek azamattardyń kiristerine qatysty bolady. Sizdiń tabysyńyz joǵary bolsa, onda siz atalǵan baǵdarlamaǵa qatysa almaısyz. Shekteý – otbasynyń bir múshesine 42,5 myń tg jáne ekinshisi – jekemenshik baspananyń bolmaýy. Atalǵan baǵdarlamaǵa qatysatyndardyń bári – qazirgi tańda baspana jaldap turatyn, óz basynda úıi joq adamdar», — dep túsindirdi tóraıym.
Sonymen qatar, Bank tóraıymy jańa turǵyn úı baǵdarlamasy aıasynda turǵyn úıdi berý kezindegi kepilzat satyp alynyp jatqan páter bolatynyn atap ótti.
«Kópbalaly otbasylarǵa qosymsha kepilzat izdeýdiń qajeti joq», — dep naqtylady L. Ibragımova.