«Astana Opera» Kameralyq zaly sahnasynda «Piccolo Teatry» nemese «Shaǵyn teatr» atty jańa joba usynylmaq. Onyń shymyldyǵy 6 jáne 7 sáýir kúnderi Dj.Rossınıdiń «Jibek saty» bir aktili opera-farsynyń premerasymen túrilip, Jastar jyly aıasynda Mádenıet jáne sport mınıstrliginiń qoldaýymen ótpek.
Oqıǵa HVIII ǵasyrda ótip, óziniń súıiktisi Dorvılge jasyryn turmysqa shyqqan Djýlııanyń tóńireginde órbıdi. Ol óziniń zańdy kúıeýine terezeden jibek satyny túsirip, sol arqyly jigit súıiktisine kóteriledi. Djýlııanyń nekeleskeninen beıhabar onyń qamqorshysy qart Dormont qyzdy Blanzakqa turmysqa berýge tyrysady. Birinen keıin biri oryn alǵan túsinispeýshilikterdiń mán-jaıy anyqtalyp, sońy baqytty aıaqtalady.
- Biz Venesııadaǵy karnavaldy kórsetemiz. Neapol men Venesııa – bul kúldirgi operanyń karnavaldyq jáne halyqtyq keıipkerleri dúnıege kelgen jerler, olardyń árqaısylarynyń óz qalyptary, tulǵasy men qyzmeti boldy. Dál osy belgilerdi ssenograf kostıýmderdi jasaý kezinde paıdalanǵan. Keıipkerlerdiń beınesi betperdelermen tolyqtyrylady, sebebi Venesııa men karnavaldy betperdesiz elestetý múmkin emes. Bul tolyqqandy bir aktili spektakl, munda keıipkerler qyzyqty oqıǵalarǵa tap bola otyryp, ózderiniń áreketterimen bárin eliktiredi. Osynyń barlyǵynan mahabbat saltanat quratyn qyzyqty oqıǵalar jelisi týyndaıdy. Bul operanyń mindeti – kóterińki kóńil-kúı syılaý, alaıda sahnada ázildi kórsetý óte qıyn, sondyqtan ártisterdiń akterlik bilim-daǵdysy bolýy tıis. Kúldirgi operada solıster kórermenderge qýanysh pen shattyqty jetkizip, ázil-syqaqty túsine bilýi kerek, sebebi ıtalıan tilin bilmeıtin tyńdarman sahnada ne bolyp jatqanyn vokalıster arasyndaǵy is-qımyl, ym-ıshara, qozǵalys pen qarym-qatynas arqyly túsinýi qajet, - dep túsindirdi qoıýshy rejısser Alla Sımonıshvılı (Italııa).
Onymen birge spektakl jumysyna qoıýshy dırıjer – Qazaqstannyń eńbek sińirgen qaıratkeri Abzal Muhıtdınov, ssenograf jáne kostıýmder boıynsha sýretshi – Manana Gýnıa (Italııa), jobanyń tehnıkalyq dırektory – Vıktor Karare, joba úılestirýshisi – Marjan Jákenova, kostıýmder boıynsha sýretshiniń assıstentteri – Janar Momynova, Aıjan Hamzına qatysyp, eńbek etýde.
- «Jibek saty» operasynyń keıbir oryndaýshylyq kúrdeliligine qaramastan, kórermen qaýymmen jeńil qabyldanady. Bul jas ánshiler úshin keremet mektep bolmaq. Árıne, «Astana Opera» teatry «aýqymdy repertýar» úshin jumys jasaıdy, týyndylar grand opera dáýirinen qoıylady. Jańa jobany júzege asyrý – keremet ıdeıa dep sanaımyn, sebebi kólemdi spektaklder bar kezde komedııany jaqsy kóretin ári basqa bir dúnıeni tamashalaýdy qalaıtyn kórermen úshin balama qoıylymdar bolýy qajet. Kameralyq zalda akterlerdiń jumysyn jaqynyraq kórip, tipti qoıylym barysyna qatysýǵa da bolady. Búginde biz vırtýaldy nársege úırenip kettik, kez kelgen sátte qalaǵanymyzdy ala alamyz, al operany jazba kúıinde tyńdaý – «jansyz» mýzykany tyńdaýmen birdeı. Teatr – bul, eń aldymen, kúsh-qýat beredi, bul óte mańyzdy, - dep qorytyndylady Alla Sımonıshvılı.
Eske salar bolsaq, 2019 jyl Jastar jyly bolyp jarııalanǵan edi, jáne «Piccolo Teatry» jańa jobasy jas daryndardy qoldaýǵa baǵyttalǵan, «Astana Opera» solısteri, sondaı-aq jańadan bastap kele jatqan qazaqstandyq vokalısterdiń ózderin bar qyrynan kórsete alatyn shyǵarmashylyq zerthanasy ispetti. «Jibek saty» operasynyń premerasy jas ónerpazdardyń, sondaı-aq tájirıbeli ártisterdiń qatysýymen ótedi. Ár kúnderi basty partııalardy oryndaıtyndar: Dormont – Ramzat Balakıshıev pen Rýslan Sovet, Djýlııa – Qazaqstannyń eńbek sińirgen ártisi Jannat Baqtaı, Qazaqstannyń eńbek sińirgen qaıratkeri Saltanat Ahmetova, Bashqurtstannyń eńbek sińirgen ártisi Alfııa Karımova men «Qurmet» ordeniniń kavaleri Aızada Kaponova. Lıýchılla – Saltanat Muratbekova, Malıka Mınızını. Dorvıl – Qazaqstannyń eńbek sińirgen qaıratkeri Jan Tapın, Damır Sádýaqasov. Djermano – Qazaqstannyń eńbek sińirgen qaıratkerleri Súndet Baıǵojın men Azamat Jyltyrkózov, Blanzak – Evgenıı Chaınıkov pen Erjan Saıpov.