Pedagogıkalyq bilim ordasynda Stýdenttik parlament quryldy. Stýdenttik parlament – barlyq qoǵamdyq birlestikterdiń basyn biriktirip, jastardy áleýmettik qoldaýda, jastar arasynda durys moraldyq-psıhologııalyq orta qalyptastyrýǵa, ýnıversıtet qabyrǵasyndaǵy uıymdastyrý-basqarý jumystaryn damytýǵa basshylyq jasaıtyn bolady.
Jaqynda ýnıversıtette Stýdenttik parlament tóraǵasyn saılaý ótti. Saılaýǵa 3 kandıdat iriktelip tústi, olar stýdentter arasynda óz jobalaryn nasıhattap, eki apta úgit jumystaryn júrgizdi.
Saılaý kúni bilim ordasy ǵımaratynyń ekinshi qabatynda úsh seksııaly kabınalar, bıýlleten tastaıtyn jáshik ornatylyp, saılaýshylarǵa bıýlleten taratatyn 5 uıymdastyrý alqasy taǵaıyndaldy. Daýys berý tańerteńgi 08.00-den túski 13.00-ge deıin jalǵasty.Daýys berýge 800-deı stýdent qatysty.
Saılaý nátıjesi boıynsha basym daýys jınaǵan Psıhologııa jáne pedagogıka fakýltetiniń 2 kýrs stýdenti Tólegenova Aızat Stýdenttik parlament tóraıymy bolyp qabyldandy.
«Bıyl Elbasymyzdyń bastamasymen belgilingen Jastar jyly ýnıversıtet stýdentteriniń ómirine jańa serpin, jumystarǵa jańa baǵyt berý maqsatynda Stýdent parlamenti uıymyn qurdyq. Parlament aldyna kóptegen maqsattar qoıylǵan. Olardyń qataryna jastar saıasatyn júzege asyrý, stýdenttik ortanyń ustazdar men ýnıversıtet basshylyǵymen tyǵyz baılanysta bolýyn qamtamasyz etý, ýnıversıtet stýdentteri arasynda ujymdyq mádenıetti qalyptastyrý, stýdentterdiń áleýmettik ómirge belsene aralasýyna, salamatty ómir saltynyń jastar arasynda mańyzǵa ıe bolýyna, stýdentterdiń jastar uıymyna múshe bolýyna, qoǵamdyq jumystarǵa belsene qatysýyna yqpal etý sekildi kóptegen máseleler kiredi. Kóptegen stýdentter ózderiniń quqyǵyn da bilmeıdi, olardyń múddelerin qorǵaý da parlament jumysynyń biri bolady» deıdi Stýdenttik parlament tóraıymy Aızat.
Názıra Járimbet,
«Egemen Qazaqstan»
Qostanaı