Memleket basshysy Nursultan Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda memlekettik apparat jumysyn jaqsartýǵa, qazaqstandyqtardyń qajettiligine degen baǵdaryn kúsheıtýge basa nazar aýdarǵan. Sondyqtan, jyl saıyn memlekettik organdar qyzmetiniń tıimdiligi baǵalanyp otyrady. Nátıjesinde, sońǵy 5 jylda Aqmola oblysy memlekettik qyzmetterdi kórsetý tıimdiligi jóninen kóshbasshyǵa aınalǵan.
Jergilikti organdar kórsetetin 202 qyzmettiń 118-i, ıaǵnı 60 prosentke jýyǵy elektrondyq formatqa aýystyrylǵan.
– Basty maqsatymyz da osy. Memlekettik qyzmettterdi elektrondyq formatqa aýystyrý. Bul portal arqyly kórsetiletin qyzmet túrleri halyqtyń oń kózqarasyna ıe bolýda. Eń kóp kórsetiletin qyzmet túri ol densaýlyq saqtaý salasy. Jaǵymdy jańalyǵymyz, osy jyldyń qańtar aıynan bastap 3 medısınalyq anyqtama tegin berilýde. Iаǵnı, bir merzimdi qupııa sóz ben logın arqyly iske asady, - dedi oblys ákimi apparaty memlekettik qyzmetterdiń usynylýyn taldaý bóliminiń jetekshisi Danagúl Jumabek.
Bir merzimdi qupııa sóz ben logın arqyly ár azamat nekege turýǵa ótinish te bere alady. Atap óterligi, halyq arasynda sıfrlyq mádenıetti damytý maqsatynda ótken jyldyń jetoqsan aıynda Kókshetaý qalasynda halyqqa sıfrly qyzmet kórsetý ortalyǵy ashylǵan.
– Bul ortalyqtyń tıimdiligi birinshiden, halyq elektrondyq formatta ózdiginen qyzmet túrlerin ala alady. О́zderińiz kórip otyrǵanyńyzdaı, halyq arasynda bul qyzmet túri suranysqa ıe. Halyqqa qyzmet kórsetý ortalyqtarynda qyzmet túrlerin kórsetýde ózgertýler engizilýde. Iаǵnı, kórsetiletin qyzmetterdiń 60 prosenti ózine qyzmet kórsetý buryshtaryna aýystyrylmaq. Al, qalǵan 40 prosenti operatorlardyń kómegimen iske aspaq. «Qoljetimdi ákimdik» jobasyn iske asyrýdamyz,–deıdi oblys ákimi apparaty memlekettik qyzmetterdiń usynylýyn taldaý bóliminiń jetekshisi.
«Qoljetimdi ákimdik» jobasy sheńberinde Kókshetaý jáne Stepnogorsk qalalarynyń ákimdikteri ǵımarattarynyń birinshi qabatynda halyqtan ótinish qabyldaý úshin qolaıly alańdar ashylýda. Búginde oblys turǵyndary úshin «Smart Aqmola» sıfrlandyrý keńsesi barlyq suraqtar boıynsha ótinishter qaldyrý qosymshasyn da ázirleý ústinde.
Baıqal BAIÁDIL,
«Egemen Qazaqstan»