El eńsesin bıiktetti

Teledıdardan Prezıdent ókilettiligin toqtatatyny týraly sheshim qabyldaǵanyn aıt­qanda, kútpegen jaǵdaı bolǵan­dyqtan, tosyrqap qaldym. Myń­jyl­dyqtardan quralǵan tarıhy bar jas memleketimizdiń irgesin qalap, táýelsizdigin tuǵyryna qondyryp, órkendep damýy úshin aıanbaı ter tókken ár kúni kóz aldymda ótkendikten qımastyq sezimim aldymen oıandy. Nurekeń­di úlken saıasatqa endi ǵana ara­lasa bastaǵan jas kúninen jete tanyǵanymdy, ázilimiz jarasyp, birge júrgenimdi, syılasyp dosym bolǵanyn maqta­nysh etemin. Prezıdenttiń zııaly qaýym­nan qashyq bolǵan kezi joq, qashanda el qadirlegen azamattarmen  aqyldasyp, keńesip-kelisip otyrdy. Qazaqstan halqynyń qoldaýyn sezine otyryp, eldi senimdi túrde alǵa jeteledi. Onyń táýelsizdikke deıin de jáne odan keıin de kóshbasshy retindegi qasıeti, danalyǵy, jeti ret oılap, bir ret kesetin sarabdal saıasaty elimizdi kóp qıyndyqtardan alyp shyq­ty. Úlken batyldyqty qajet ete­tin jerlerde irkilmeı, irilik tanytty. Elimiz úshin óte ma­ńyz­dy sheshimder qabyldan­dy. Elin súıgen Elbasyny eli de qurmet tutty, senim artty, súıenishi bolý­ǵa jarady. Sonyń arqasynda post­keńestik el­derdiń arasynda Qazaq­stannyń abyroıy men bedeli joǵary bolmasa, shúkir, eshbir elden kem qalǵan jeri joq.

Basqa salalardy aıtpaǵan­da, ónerdi janymen súıetin N.Nazar­baev rýhanııatqa kelgende tartynyp, qarjy únemdep qal­dy dep eshkim de aýzy baryp aıta almas edi. Elimizde qanshama halyq­ara­lyq deńgeıdegi shoqty­ǵy bıik óner báıgeleri, teatr festıvalderi, klassıkalyq óner dodalary  alma-kezek ótkizilip, halqymyzdyń mádenıetiniń ósip-órkendeýi, álemdik damýdan kenje qalmaı, terezesi teń bolyp, kóshke ilesýi úshin qolynan kelgen bar jaǵdaıdy jasady. Osynyń arqasynda óner men mádenıettegi talanttarymyz tanylyp, olar dúnıe júziniń eń ataqty sahnalaryn birinen soń birin baǵyndyryp jatyr. Muny tek soqyr adam nemese nıeti bu­zyq adam ǵana kórmeıdi.  

Kóp etnosty Qazaqstannyń erek­­­sheligin eskere otyryp, du­rys júrgizgen saıa­­satynyń negi­zinde elimizde turaq­­ty­lyq pen ultaralyq, dinaralyq tatýlyq saltanat qurdy. Endigi tilek talaı tar jol, taıǵaq keshýlerden, ot pen sý­dan  halqymyzdy aman-esen alyp kele jatqan Alla taǵalam Nure­keń memlekettiń negizgi saıa­satyna aınaldyrǵan osy birlik pen berekeden ajyratpasa eken dep tileımin. Tynyshtyq pen tatý­lyq – bizdiń zor baılyǵymyz. Álem­niń ár buryshynda jańa jan­jal oty tutanyp, búlikke batyp, mazasyz kúı keship jatqanda, memleket úshin tynyshtyqtyń bas­ty qundylyq ekenine bizdiń kózimiz búgin anyq jetip otyr. Tereńnen oılaıtyn Prezıdent uzaq tolǵanysynan soń osyndaı sheshim qabyldaǵan bolar dep oılaımyn. Nurekeńniń eńbegine alǵys qana aıtamyz. El ornynda, halyq óz ómirin súrip jatyr, endeshe alańdaıtyn eshnárse joq. Tek alǵa basyp, qalyptasqan óz jolymyzben júre bergenimiz abzal bolar. 

Sábıt ORAZBAEV,

Qazaqstannyń halyq ártisi, Memlekettik syılyqtyń laýreaty