Memleket basshysynyń tapsyrmasymen Premer-Mınıstr Asqar Mamın Aqmola oblysyna bardy. Oblystyq máslıhattyń kezekten tys sessııasynda A.Mamın Prezıdent Nursultan Nazarbaevtyń Aqmola oblysynyń ákimi qyzmetine Ermek Marjyqpaevty taǵaıyndaý týraly usynysyn oqyp berdi. Máslıhat depýtattary kandıdatýrany biraýyzdan qoldady.
О́ńir aktıvimen kezdesýde Premer-Mınıstr M.Myrzalınge oblys ákimi qyzmetindegi jumysy jáne óńirdiń áleýmettik-ekonomıkalyq damýyna qosqan úlesi úshin alǵys bildirdi. M.Myrzalınniń basshylyǵymen oblysta jańa áleýmettik nysandar salynyp, onyń ishinde týrızm salasynda iri ınfraqurylymdyq jobalar iske asyryldy.
«Memleket basshysy taǵaıyndaǵan barlyq qyzmetterde Málik Keńesbaıuly joǵary senimdi aqtaı bildi», dedi A.Mamın jáne oǵan jańa qyzmetinde tabys tiledi.
О́ńirdiń jańa basshysyn tanystyrǵan A.Mamın osy kúnge deıin E.Marjyqpaev Kókshetaý qalasynyń ákimi bolyp jumys istep kelgenin aıtty. Arshaly, Zerendi aýdandarynyń ákimi, Aqmola oblysy ákiminiń orynbasary retinde qyzmet etip, óńirdiń damýyna zor úlesin qosqanyn jetkizdi.
«Qazir oblystyń aldynda Elbasynyń «Áleýmettik qamqorlyq» jańa áleýmettik sharalary aıasynda aýqymdy mindetter tur. Azamattardyń ál-aýqatyn arttyrýǵa, halyqtyń áleýmettik-ekonomıkalyq jaǵdaıy men turmys sapasyn jaqsartýǵa baǵyttalǵan naqty sharalardy júzege asyrý qajet», dedi A.Mamın.
Sonymen qatar agroónerkásiptik keshenniń odan ári qarqyndy damýyn jedeldetip, týrıstik áleýetin damytý boıynsha naqty jumysty uıymdastyrý qajet.
«2020 jyly Kókshetaý qalasynda Qazaqstan men Reseı О́ńiraralyq yntymaqtastyǵy forýmy ótedi. Oblys osy mańyzdy is-sharanyń joǵary deńgeıde ótýin qamtamasyz etýi kerek», dep tapsyrdy Premer-Mınıstr.
Sońynda A.Mamın oblys aktıvimen birlesip ákim retinde E.Marjyqpaevtyń óńir aldyna qoıylyp otyrǵan barlyq tapsyrmalardyń sapaly oryndalýyn qamtamasyz etetinine senim bildirdi.