Memleket tarıhy ınstıtýtynyń dırektory, tarıh ǵylymdarynyń doktory Búrkitbaı Aıaǵan Elbasy týraly pikir bildirdi.
Elbasynyń sheshimi eshkim kútpegen, tańǵalarlyq oqıǵa boldy. Postkeńestik keńistikte Reseıden basqa birde-bir elde mundaı oqıǵa bolǵan joq. Tipti, álemdik tarıhta sırek kezdesetin oqıǵalardyń biri dep aıtýǵa bolady. Nursultan Nazarbaev kúsh-qýaty boıynda, eldi áli de konstıtýsııalyq merzimi aıaqtalǵansha basqaratyn sııaqty kóringen. Kelesi saılaýǵa túsýge de múmkinshiligi bar sııaqty edi. Biraq ol barlyq ahýaldy saralap, óz erkimen osyndaı sheshimge kelip otyr. Konstıtýsııanyń talabyn buzbaı, bılikti Senat Tóraǵasyna bergeni de óte durys sheshim boldy dep sanaımyz. Bul sheshimdi eshkim de teris dep aıta almaıdy.
Nursultan Nazarbaevtyń Táýelsiz Qazaqstannyń qalyptasýyna sińirgen eńbegin eshteńemen salystyrýǵa bolmaıdy. Ol eldi neshe túrli tuńǵıyqtar men tyǵyryqtardan aman alyp shyqty. Olardy atap shyǵýdyń ózi birneshe maqalaǵa júk bolar edi. Sondyqtan men tek Qazaqstannyń aýmaqtyq tutastyǵyn saqtap qalǵan aıryqsha eńbegin ǵana atap ótkim kelip otyr. Postkeńestik elderde Baltyq boıy men Ortalyq Azııa respýblıkalarynan basqalarynyń bári terrıtorııalyq tutastyǵyn joǵaltyp aldy. Qazaqstanǵa da ondaı qaýipter tóngen edi. Tek Nursultan Nazarbaevtyń birden-bir durys qadamdary ǵana respýblıkanyń tutastyǵyn saqtap qaldy. Osy jolda ol óziniń naǵyz saıasatkerge tán qyrlaryn, tulǵalyq sheberlikterin, adamı qasıetteriniń bárin kórsetti. Endi solardyń bári tarıhtyń enshisine aınalyp, uzaq jyldar boıy zertteýshilerdiń nysanyna aınalatyn bolady.
Prezıdenttiń sózinen keıin men kóptegen adammen kezdesip, oı bólistim. Sonda jurttyń bári de tolqyp, ony qımastyqpen aýyzǵa alǵanynyń kýási boldym. Osynyń ózi onyń halyq júregine jol tapqandyǵynyń belgisi shyǵar. Onyń áli de saıası sahnadan múlde ketpegendigi de bizdiń elimizge qajet. Qaýipsizdik Keńesiniń tóraǵasy bolýy jańa prezıdentke aqyl-keńesin aıtyp otyrýyna jaqsy jaǵdaı týǵyzady. Al Qasym-Jomart Kemelulyn jaqsy bilemiz, eldi basqarýǵa onyń saıasatkerlik deńgeıi, aqyl-oıy, bilimi men biligi tolyq jetedi dep sanaımyn.