Prezıdent janyndaǵy Qazaqstan strategııalyq zertteýler ınstıtýty dırektorynyń orynbasary, saıası ǵylymdar doktory Sanat Kóshkimbaev Elbasynyń qabyldaǵan sheshimine qatysty pikir bildirdi.
Keshe Elbasy Nursultan Nazarbaev elimizdiń bolashaǵyna qatysty asa mańyzdy ári tarıhı málimdeme jasap, óziniń prezıdenttik ókilettigin toqtatatynyn aıtty. Bul dál osy kezeńde el kútpegen, biraq Qazaqstannyń damý strategııasyn aldaǵy birneshe jyldy esepke ala otyryp anyqtaǵan Uly saıasatkerdiń sheshimi. О́ıtkeni tek eliniń bolashaǵyn oılaıtyn jaýapkershiligi joǵary saıasatkerler ǵana dál osyndaı sheshimderdi qabyldap, qadam jasaı alady. Onyń ústine Qazaqstannyń Tuńǵysh Prezıdenti qazirgi táýelsiz Qazaqstannyń negizin salýshy retinde jáne onyń belsendi is-áreketteri men qyzmetiniń arqasynda, dańqty joly arqyly elimiz halyqaralyq deńgeıde memleket retinde moıyndaldy. Qazaqstandy tek kórshiler ǵana emes, álemdik grandtar – derjavalar moıyndady. Oǵan qosa, Elbasyn ár jyldary álemdik saıasattyń saıypqyrandary joǵary baǵalaǵandyǵyn eskerý kerek. Onyń ishinde Margaret Tetcher Prezıdent Nursultan Nazarbaevtyń álemdik saıasatqa qosqan úlesin joǵary baǵalap, Elbasyn álemniń eń dańqty 5-6 saıasatkeriniń qataryna qosqandyǵyn kúlli álem biledi. Sondaı-aq kezinde úlken Djordj Býshtyń ózi Nursultan Nazarbaevqa qushaǵyn aıqara ashyp, bizdiń prezıdenttiń mártebesin joǵary baǵalaǵany este.
Sonymen qatar Nursultan Nazarbaevty Sıngapýrdyń tuńǵysh premer-mınıstri Lı Kýan Iý jáne Qytaıdyń qazirgi reformalarynyń ákesi Den Sıaopınmen salystyra alamyz. Qytaılyq saıasatker elde joǵary laýazymda bolmasa da, Qytaıdyń zamanaýı reformalarynyń ákesi dep baǵalaýǵa turarlyq tulǵa. Bıyl qytaılyqtar osy ashyq reformalarynyń júrgizile bastaýynyń 40 jyldyǵyn atap ótedi.
Onyń ústine Sıngapýr, Qytaı sııaqty qazirgi alyp memleketter Nursultan Nazarbaev sııaqty uly tulǵalarynyń arqasynda ósip-óndi.
Sondyqtan da Nursultan Nazarbaevtyń Qazaqstan tarıhyndaǵy róli bul tulǵalardan esh kem túspeıdi. Ol qazirgi ekonomıkalyq damý modeliniń arhıtektory ekendiginde daý joq. Tarıhta, saıasatta Nazarbaev modeliniń tabystylyǵy, tıimdiligi men ónimdiligi dáleldenip otyr. Qıyn ýaqyttarda ekonomıkalyq daǵdarystar, geosaıası kúızelister Nazarbaevtyń basshylyǵynyń arqasynda bizdiń elimizge asa zalalyn tıgize qoıǵan joq. Ortalyq Azııa aýmaǵynda naǵyz kóshbasshyǵa aınalyp, eldegi, óńirdegi turaqtylyq pen qaýipsizdik kepili bola bildi.
Eń bastysy, Elbasy – Qazaqstannyń Tuńǵysh Prezıdentiniń el damýyndaǵy róli arta túspek. Nursultan Nazarbaevtyń Qaýipsizdik Keńesiniń tóraǵasy retinde qyzmetin jalǵastyrýy erteńge senimdi nyǵaıta túsedi.