Sanaýly saǵattardan keıin Japonııanyń Saıtama qalasynda mánerlep syrǵanaýdan álem chempıonaty bastalady. Búgin jankúıerler áıelderdiń jekelegen saıysy men juptyq básekeniń qysqa baǵdarlamasyn tamashalaıdy.
Barsha qazaqstandyq jankúıerler Elızabet Tursynbaevanyń muz aıdynyna shyǵýyn taǵatsyzdana kútýde. Jýyrda ǵana Dúnıejúzilik Ýnıversıadada kúmis medaldi ıelengen qazaq qyzy osy jarysta da tabysty óner kórsetedi dep úmittenýde. Sonymen qatar Kún shyǵys elinde reseılik Evgenııa Medvedeva men Alına Sagıtova, japonııalyq Satoka Mııahara, amerıkalyq Bredı Tennell, kanadalyq Gabrıel Deılman jáne taǵy basqa juldyzdar óner kórsetedi.
Erteń juptar arasynda júldeli oryndar sarapqa salynsa, erler qysqa baǵdarlamada baq synaıdy. 22 naýryzda muzdaǵy bıshiler juby alǵashqy jattyǵýyn ótkizse, áıelder saıysynda jeńimpaz ben júldegerler anyqtalady. Jarystyń sońǵy kúni muzdaǵy bıshiler men erler básekesinde myqtylar anyqtalady.
Ǵalym SÚLEIMEN,
«Egemen Qazaqstan»