Búgin Qazaqstan Respýblıkasy Ortalyq saılaý komıssııasynyń otyrysy boldy. Onda N.Nazarbaevtyń ókilettigin merziminen buryn toqtatý, Senat Tóraǵasy Q.Toqaevtyń ókilettigin toqtatý jáne Qazaqstan Respýblıkasynyń Prezıdenti ókilettiginiń Q.Toqaevqa kóshkeni týraly máseleler qaralǵan.
«Konstıtýsııanyń 42-babynyń 3-tarmaǵyna sáıkes Respýblıka Prezıdentiniń ókilettigi jańadan saılanǵan Respýblıka Prezıdenti qyzmetine kirisken kezden bastap, sondaı-aq Prezıdent qyzmetinen merziminen buryn bosatylǵan jaǵdaıda toqtatylady» delingen habarlamada.
Ortalyq saılaý komıssııasy atap ótkendeı, Konstıtýsııalyq Keńes 2019 jylǵy 15 aqpandaǵy qaýlysymen Qazaqstan Prezıdentiniń konstıtýsııalyq mártebesinen onyń óz erki boıynsha ókilettigin toqtatý quqyǵy týyndaıdy, ol Memleket basshysynyń ókilettigin merziminen buryn toqtatýǵa derbes negiz bolyp tabylady. Tıisti qaýly qabyldandy.
«Konstıtýsııanyń 48-babyna sáıkes Qazaqstan Respýblıkasynyń Prezıdenti qyzmetinen merziminen buryn bosaǵan jaǵdaıda Qazaqstan Respýblıkasy Prezıdentiniń ókilettigi qalǵan merzimge Parlament Senatynyń Tóraǵasyna kóshedi. О́zine Respýblıka Prezıdentiniń ókilettigin qabyldaǵan tulǵa tıisinshe Senat Tóraǵasynyń ókilettigin doǵarady» delingen Ortalyq saılaý komıssııasynyń habarynda.
Tıisinshe, № 885 Jarlyqtyń 2-tarmaǵymen Prezıdenttiń ókilettigi qalǵan merzimge Senat Tóraǵasy Qasym-Jomart Kemeluly Toqaevqa kóshti.
Osyǵan baılanysty Konstıtýsııanyń 48-babynyń 1-tarmaǵyn jáne «Qazaqstan Respýblıkasynyń Parlamenti jáne onyń depýtattarynyń mártebesi týraly» normalardy basshylyqqa ala otyryp, OSK Senat Tóraǵasynyń ókilettigin toqtatýǵa ákeletin negizdiń týyndaǵany týraly qaýly qabyldap, Parlament Senatyna tıisti usynym engizdi.
Ortalyq saılaý komıssııasy qabyldanǵan qaýlylardyń Qazaqstan Respýblıkasynyń Konstıtýsııasyna, «Qazaqstan Respýblıkasynyń Prezıdenti týraly» Qazaqstan Respýblıkasynyń Konstıtýsııalyq Zańyna sáıkes, «Qazaqstan Respýblıkasy Prezıdentiniń ókilettigin atqarý týraly» Qazaqstan Respýblıkasy Prezıdentiniń 2019 jylǵy 19 naýryzdaǵy № 887 Jarlyǵy negizinde qabyldanǵanyn aıtty.