Sultan Beıbarys alańynda jańa jolaýshylar kóligin paıdalanýǵa berý saltanatty rásimi ótti. Bul týraly Atyraý qalasy ákimdiginiń baspasóz qyzmeti habarlady.
Naýryz meıramy qarsańynda Semeı qalasy óndiretin 30 jańa avtobýs paıdalanýǵa berildi. Qoǵamdyq kólik «Teńizshevroıl» JShS demeýshiligimen satyp alyndy.
- Búgingi tańda «Teńizshevroıl» JShS «SaryarqaAvtoProm» JShS óndirýshisimen 50 «ANKAI» markaly avtobýstaryn satyp alý jóninde kelisim jasasty. Sonymen qatar, «Teńizshevroıl» JShS men Atyraý oblysynyń ákimdigi arasynda jolaýshylar tasymalyn uıymdastyrý úshin avtobýstardy tegin berý týraly kelisim jasaldy. Qazirgi tańda 30 avtobýs jetkizildi, aǵymdaǵy jyldyń sáýir aıynda taǵy 20 kólik birligin jetkizý josparlanýda, - deıdi ÁKK «Atyraý» AQ Basqarma tóraǵasynyń orynbasary Amantaı Aıtbaev.
Amantaı Aıtbaevtyń aıtýynsha, «ANKAI» avtobýsy «Akzhayik Avtopark» JShS qurǵan avtoturaq balansyna túsedi, olar múmkindigi shekteýli jandarǵa arnalǵan pandýstardyń jáne sandyq taqtanyń bolýyna baılanysty ortalyq qalalyq baǵyttarǵa jiberiledi. Daewoo avtobýstaryna «Atyrau-Avtopark» avtoturaǵy qalǵan qalalyq baǵyttar boıynsha jumys isteıtin bolady.
- Atyraý oblysynyń ákimi Nurlan Noǵaevtyń tapsyrmasy boıynsha Atyraýda qoǵamdyq kólikti damytý tujyrymdamasy sátti júzege asyrylýda. Joba aıasynda 91 jańa avtobýs satyp alyndy, al ótken jyldyń qazanynda qoǵamdyq kólikte elektrondy bıletter júıesi engizildi. Osylaısha, búgin Atyraýda shamamen 30 marshrýt bar, onyń ishinde 190 avtobýs júredi. Elektrondyq bıletterdi satý júıesi 12 marshrýt boıynsha júzege asyryldy, onyń ishinde 130 avtobýs jumys isteıdi, - deıdi Atyraý qalasynyń ákimi Álımuhammed Quttymuratuly.
Pandýstary bar jańa avtobýstardy múmkindigi shekteýli jandar synaqtan ótkizdi. Olardan óz betimen kóterilip, túsýin surady.
- Atyraý úshin bul - shynymen jańashyldyq. Biz Atyraý qalasynyń ákimine birneshe ret múmkindigi shekteýli jandar úshin qoǵamdyq kóliktegi qoljetimdilikti qurý qajettiligi týraly birneshe ret ótinish bildirdik. Biz máseleniń birte-birte sheshilip jatqanyna óte rızamyz. Avtobýstar múgedekterge tolyǵymen beıimdelgen, - deıdi arbaǵa tańylǵan qyz Janar Dáýlet.
Aıta keteıik, Atyraý oblysy ákiminiń tapsyrmasy boıynsha oblysta qoǵamdyq kólikti damytý tujyrymdamasy júzege asyrylýda. Joba sheńberinde qoǵamdyq kólik jańartyldy, ótken jyldyń qazanynan bastap elektrondy bılet júıesi engizildi. Jolaýshylar tasymaly salasynda qyzmet kórsetý sapasyn arttyrý maqsatynda eki jańa avtoturaq quryldy, qoǵamdyq kóliktegi buzýshylyqtardyń aldyn alý úshin Baqylaý jáne aýdıt qyzmeti jumys isteıdi.
Baqytgúl BABASh,
«Egemen Qazaqstan»
Atyraý