Memleket basshysy Qasym-Jomart Toqaev Parlamenttiń qos palatasy men Úkimet músheleriniń aldynda Astana qalasynyń jáne elimizdegi oblys ortalyqtarynyń negizgi ortalyq kóshelerin elimizdiń Tuńǵysh Prezıdenti, Elbasy Nursultan Nazarbaevtyń esimimen ataý týraly usynys jasaǵan bolatyn.
Atalǵan usynysty qabyl alǵan jergilikti aktıvter men máslıhat depýtattarynyń qoldaýymen birqatar óńir ortalyqtaryndaǵy negizgi kóshelerge Elbasy Nursultan Nazarbaevtyń esimi berildi. Eń áýeli elordanyń ataýyn ózgertý týraly Astana qalalyq máslıhatynyń kezekten tys sessııasynda shahar basshysy Baqyt Sultanov Nursultan Nazarbaevtyń san qyrly batyl bastamalarynyń biri búginde óziniń jeke qoltańbasyna aınalǵan elorda ekenin atap ótip, sondyqtan turǵyndardyń Prezıdent Q.Toqaevtyń usynysyn qoldaıtynyn jetkizdi. Máslıhat depýtattarynyń biraýyzdan qoldaýynan soń qala ataýyn «Nur-Sultan» dep jazý týraly usynys Úkimet pen respýblıkalyq komıssııaǵa jiberildi.
Sonymen birge Parlament palatalarynyń birlesken otyrysynda Astananyń ataýyn Nur-Sultan qalasyna ózgertý týraly Zań qabyldandy. «Memleket basshysy Konstıtýsııanyń 91-babynyń 1-tarmaǵyna sáıkes, Parlamenttiń qaraýyna «QR Konstıtýsııasyna ózgerister engizý týraly» Qazaqstan Respýblıkasy zańynyń jobasyn engizdi. Bul joba respýblıka astanasynyń ataýyn Astana qalasynan Nur-Sultan qalasyna ózgertýdi kózdeıdi. «QR Konstıtýsııasyna sáıkes, Úkimet Ata Zańymyzǵa Astananyń ataýyn ózgertý týraly túzetý engizý úshin Respýblıkalyq referendým ótkizý jóninde Prezıdentke usynys jasady. Prezıdent bul usynysty referendýmǵa shyǵarmaı, Parlamenttiń qaraýyna jiberý týraly sheshim qabyldady.
Bul másele boıynsha Konstıtýsııalyq Keńes óziniń oń qorytyndysyn da berdi», dedi Parlament Májilisiniń Tóraǵasy Nurlan Nyǵmatýlın. Birlesken otyrys barysyndaǵy talqylaýdan keıin depýtattar biraýyzdan Astananyń ataýyn Nur-Sultan qalasyna ózgertý týraly sheshim qabyldady. Sondaı-aq, elimizdiń birqatar oblystarynda máslıhattardyń sheshimimen ortalyq kóshelerdiń ataýy ózgerdi. Mysaly, Shyǵys Qazaqstan oblysynyń ákimshilik ortalyǵy О́skemen qalasynyń Táýelsizdik dańǵylyna Nursultan Nazarbaevtyń esimi beriletin boldy. Dańǵyldyń tolyq ataýy – «Nursultan Nazarbaev dańǵyly».
Shymkent shaharynyń ákimshilik-iskerlik ortalyǵynda ornalasqan Astana dańǵyly da Nursultan Nazarbaev dańǵyly bolyp ózgertildi.
Taraz qalasyndaǵy eń úlken kóshelerdiń biri sanalatyn Tóle bı dańǵylyna Nursultan Nazarbaev ataýy berildi. Al Tóle bı ataýymen Tashkent kóshesi atalatyn boldy.
Aqtóbede Ábilqaıyr han dańǵylynyń bir bóligine, ıaǵnı Álııa Moldaǵulova dańǵylynan Bókenbaı batyr kóshesine deıingi aýmaǵyna Nursultan Nazarbaev kóshesi ataýy berildi.
Sol sııaqty Petropavl qalasyndaǵy eń uzyn kósheniń biri – Mır kóshesi endi Elbasynyń esimimen atalady. Sondaı-aq Oraldaǵy Dostyq-Drýjba dańǵyly Nursultan Nazarbaev dep atalatyn boldy. Bul týraly sheshim Oral qalalyq máslıhatynyń kezekten tys sessııasynda qabyldandy. Oral qalalyq máslıhaty normatıvtik-quqyqtyq máseleler jónindegi turaqty komıssııasynyń tóraǵasy Amangeldi Ermekqalıev, qalalyq qoǵamdyq keńesiniń tóraǵasy Baqytjan Nurbaev jáne qalalyq máslıhat depýtattary Valentına Mıhno, Ánýar Muqataev Tuńǵysh Prezıdent Nursultan Nazarbaevtyń táýelsiz Qazaqstandy damytýdaǵy eńbegi orasan ekenin, Dostyq dańǵylynyń ulttar dostyǵyn bekemdegen Elbasynyń esimimen atalýy jarasatynyn atap ótti. Qoǵamdyq tyńdaý kezinde aqyn, Memlekettik syılyqtyń laýreaty Aqushtap Baqtygereeva Nursultan Ábishulynyń elimizdi 90-jyldardyń qıyn kezeńinen alyp shyǵyp, dostyq pen beıbitshiliktiń mekenine aınaldyrǵanyn aıtty. Jańa dańǵyldyń boıynda kóptegen ákimshilik-iskerlik, mádenı nysandarmen birge, Abaı men Syrym Datuly, Qurmanǵazy men II Dúnıejúzilik soǵystyń qaharman qyzdary Mánshúk, Álııa jáne Hıýaz eskertkishteri ornalasqan. Dańǵyldyń HIH ǵasyrdyń arhıtektýralyq eskertkishteri shoǵyrlanǵan biraz bóligi ashyq aspan astyndaǵy murajaı retinde memleket qorǵaýyna alynǵan.
Dál osyndaı otyrys Mańǵystaý óńirinde de ótkizilip, oblystyq máslıhat depýtattary Aqtaýdaǵy eń úlken dańǵyldy Nursultan Nazarbaev esimimen ataý týraly sheshim shyǵardy. Bul dańǵyl №1 shaǵyn aýdandaǵy Aqbota saıabaǵynan bastalyp, №17 shaǵyn aýdandaǵy «Grın Park» turǵyn úı keshenine deıin jalǵasyp jatyr.
Depýtattar biraýyzdan qoldaǵan bul usynystar boıynsha naqty sheshim respýblıkalyq onomastıkalyq komıssııada qaralatyn bolady.
Dýman ANASh,
Aıdana ShOTBAIQYZY,
«Egemen Qazaqstan»