UǴA akademıgi, «Ǵasyr ǵulamasy» ataǵynyń ıegeri, Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaev mańyzdy málimdeme jasap, óziniń Prezıdenttik ókilettigin toqtatty. Bul sheshim Qazaqstan halqy úshin kútpegen jaǵdaı boldy. Elbasy tereń oılanyp, elimizdiń turaqtylyǵy úshin osyndaı sheshimge kelip otyr. Osy otyz jyldyqta ol parasat-paıymmen, sarabdal saıasatymen Qazaq eliniń qasıetin arqalap, álemdegi abyroıyn asqaq etti. Bul memleket tarıhynda ǵana emes, álem jylnamasynda qalary sózsiz. Qıyn-qystaý kezeńde qııadan jol taýyp, shekaramyzdy bekittik, Astanamyzdy salyp bolashaǵymyzǵa baǵdar qurdyq. Nursultan Nazarbaev tek memleket deńgeıinde shektelmeı, álemde bolyp jatqan oqıǵalar men túrli jaǵdaılarǵa sarabdal saıasatymen ún qosa otyryp, Qazaqstannyń ózge eldermen terezesi teń túsýine uıytqy bolǵan parasatty basshy retinde qoltańba qaldyra bildi. Ǵasyrlar boıy ańsaǵan táýelsizdiktiń týyn tiktegen Tuńǵysh Prezıdent eń aldymen halyqtyń rýhanııatyna erkindik bergendigimen qurmetke ábden laıyq.
Nursultan Ábishuly otyz jylǵa jýyq eldi basqardy, qıyn kezeńderden óttik, al onyń birqatary Qazaqstan úshin qaýipti boldy deýge negiz bar. Biraq qandaı qıyn kezeńderde de tıimdi sheshim taýyp, tyǵyryqtan shyǵýdyń jolyn taba bildi. Munyń ózi erlik. Árıne otyz jyl bir adamnyń ómiri úshin úlken merzim, biraq memleket úshin bul qas-qaǵymdaı ýaqyt.
Aldaǵy merzimde de halqymyzǵa aýyzbirshilik kerek. Alla taǵala bizge táýelsizdik berdi, osy táýelsizdigimiz máńgilik bolsyn! Táýelsizdik bolsa memleketimiz bolady, aýyzbirshilik bolsa memleketimiz kúsheıedi. Aldymyzda úlken syn saǵaty soqqaly tur. Osy kezde sabyrlyqty serik ete otyryp, tózimdilikpen ata-babalarymyz amanat etken darqan dalamyzdy saqtap, ósıetterin ónege ete otyryp, aldaǵy kúnderge adymdaı bermekpiz.
Elbasy N.Á.Nazarbaevtyń keıingilerge kórsetken úlgisi jáne salyp ketken izgi dara joly men elimizdiń egemendigi úshin qurmetimiz sheksiz!
Murat JURYNOV,
Memlekettik syılyqtyń laýreaty, UǴA prezıdenti, akademık