Túrkistan oblysy Ordabasy aýdanyndaǵy «Bórte mılka» kásipornynyń jumysshylary elordanyń «Nur-Sultan» atalýyn qoldaıdy. Bul týraly kásiporyn basshysy ári oblystyq máslıhat depýtaty Eraly Ábish málimdedi.
Seriktestik dırektorynyń aıtýynsha, shırek ǵasyrdan astam ýaqyt memleketti basqarǵan ári Qazaqstandy búkil álemge tanytqan Elbasynyń sińirgen eńbegi orasan zor. Sondyqtan Nursultan Nazarbaevtyń esimin elordaǵa berý onyń eńbegin baǵalaý dep sanaýǵa bolady.
«Qazaqstannyń tuńǵysh Prezıdenti Elbasy Nursultan Nazarbaevtyń el basqarýdaǵy ókilettiligin toqtatý jóninde qabyldaǵan sheshimi men úshin kútpegen jaǵdaı boldy. Árıne, bul ómirde eshnárse de máńgilik emes. Aldyńǵy tolqyndy keıingi tolqyn urpaq almastyratyny tabıǵı zańdylyq. Sol úshin Prezıdenttiń bılik tizginin óz qalaýymen tapsyrýy Elbasynyń kóregendiliginen týǵan sheshim dep qabyldadyq.
Memleket basshysynyń el damýyna qosqan úlesi ushan-teńiz. Qandaı jaqsylyq bolsa da onyń bastaýynda Elbasy tur. Ishki turaqtylyqty qamtamasyz etýdegi eńbeginen bólek, syrtqy saıasatta da Prezıdenttiń salmaǵy aýyr. Halyqaralyq ahýaldar Elbasynyń bitimgerligimen sheshilgeni aıan. Oǵan Sırııadaǵy, Ýkraınadaǵy jaǵdaılardy mysalǵa keltirsek bolady», - deıdi kásiporyn basshysy Nuraly Ábish.