Mánerlep syrǵanaýdan Japonııanyń Saıtama qalasynda ótip jatqan álem chempıonatynda Elızabet Tursynbaeva kúmis medaldi ıelenip, kúlli qazaqstandyq jankúıerlerdi qýanysh pen shattyqqa bóledi.
Qysqa baǵdarlamada úshinshi oryndy ıelengen Elızabet Tursynbaeva jarystyń sheshýshi kúni de tamasha óner kórsetip, 224.76 upaıǵa ıelik etti. Osy kórsetkishiniń arqasynda qazaq qyzy kúmis medaldi ıelendi. Osy sport túrin serik etken Qazaqstannyń birde-bir arýy álem chempıonatynda buryn-sońdy jeńis tuǵyryna kóterilmegen edi. Mine, sol kóshti 19 jastaǵy Elızabet bastady.
Kúlli Qazaqstan halqyn, Alash jurtyn osy tarıhı tabyspen quttyqtaımyz! Osyndaı asa daryndy sulýdy ómirge jáne sporttyń sıqyrly álemine ákelip, osy soqpaqta barynsha qoldaý kórsetken ákesi Baıtaq pen anasy Padıshahanǵa myń da bir alǵys! Elızabet Tursynbaevany keleshekte budan da bıik belesterden kóreıik!
Al álem chempıony ataǵy Reseıdiń ataqty sportshysy, Olımpıada jáne Eýropa chempıony, 16 jastaǵy Alına Zagıtovaǵa buıyrdy. Úshinshi orynda – eki dúrkin álem jáne Eýropa chempıony, Olımpııa oıyndarynyń kúmis júldegeri Evgenııa Medvedeva.
Ǵalym SÚLEIMEN,
«Egemen Qazaqstan»