Qaraǵandyda Naýryz meıramyna arnalǵan halyqtyq serýen ótken. Sondaı-aq merekelik konsert kezinde «Hareket» qaıyrymdylyq qory kópbalaly otbasyǵa páter kiltin tabys etti. Bul týraly Qaraǵandy oblysy ákimdiginiń baspasóz qyzmeti habarlady.
Qaraǵandy oblysy boıynsha qaıyrymdylyq qorynyń ókili Aqtoty Júnisova «Hareket» qaıyrymdylyq qorynyń ashylǵanyna nebári bir jyl bolsa da, osy ýaqyt aralyǵynda 82 otbasyn baspanamen qamtamasyz etkenin aıtty. Mereke kúni Qaraǵandy oblysyndaǵy kóp balaly anaǵa páter kiltin tabystaǵan.
Onyń aıtýynsha, alty balanyń anasy Ardaq olarǵa qujattaryn tapsyrǵanyna bir apta ǵana ýaqyt ótken, al búgin Maıqudyq yqsham aýdanynda eki bólmeli páterdiń kiltin aldy.
- Úlken rahmet, men barlyǵyna jáne «Hareket» qoryna óte rızamyn. Men jesirmin, jalǵyz ózim alty balany asyrap otyrmyn. Úlken ulym 21, al kishi qyzym 9 jasta. Bes jyl buryn Qaraǵandyǵa kóship keldik, osy ýaqyt ishinde biz páter jaldap turdyq, óte qıyn boldy. Biraq búgin, Naýryz meıramynda maǵan tosyn syı jasady, páter kiltterin tabys etti, men óte qýanyshtymyn. Aıta ketetin jaıt, qazir Tuńǵysh Prezıdenttiń tapsyrmasy boıynsha men sııaqty kóp balaly analarǵa barlyq qajetti kómek kórsetile bastady. Bul úshin Elbasyna, jergilikti bılikke jáne osyndaı qaıyrymdylyq qorlarǵa alǵysymdy bildiremin, - dedi kópbalaly ana Ardaq Jumabekova.
Aıta keteıik, ortalyq saıabaqta Naýryz merekesine qaraı 30 ekspozısııalyq kıiz úı men 20-ǵa jýyq saýda shatyry ornatylǵan. Munda «sheberler qalasy» men altybaqan da bar.
Oblystyq ólketaný murajaıy eki kıiz úıdi usyndy. Onda Uly dalanyń jeti qyryn beıneleıtin dástúrli qazaq qolóneri men jádigerlerin kórýge bolady.
Saıabaqta merekelik is-sharalar men konsert jalǵasýda. Sahnada halyq ujymdary men Q. Baıjanov atyndaǵy konserttik birlestiktiń solısteri óner kórsetedi.
Esterińizge sala keteıik, Qaraǵandyda Naýryz meıramyn toılaý bir kúnmen shektelmeıdi. 25 naýryzǵa deıin qalada ulttyq sport túrleri boıynsha sporttyq jarystar, sándik-qoldanbaly óner buıymdarynyń kórmeleri, sulýlyq baıqaýlary, ulttyq taǵamdardy daıyndaý boıynsha otbasylyq saıystar ótedi.
Aýla klýbtarynda ashyq alańdarda merekelik konsertter men ulttyq sporttyq saıystar uıymdastyryldy.