Jaratylystaný-matematıkalyq baǵyttaǵy pánder boıynsha respýblıkalyq olımpıadada Pavlodar oblysynyń komandasy «Eń úzdik olımpıadalyq komanda - 2019» ataǵyna ıe boldy, dep habarlaıdy pavlodarnews.kz.
Bul týraly «Ertis daryny» óńirlik qosymsha bilim berý oqý-ádistemelik ortalyǵy málim etti.
- Jaratylystaný-matematıkalyq baǵyttaǵy pánder boıynsha respýblıkalyq olımpıada Aqtóbe qalasynda ótti, - dedi ortalyqta. – Bilim básekesine elimizdiń 14 aımaǵynan kelgen 19 komanda quramynda 832 oqýshy qatysty. Pavlodar oblysynyń namysyn qorǵaǵan oblystyq olımpıadanyń 43 jeńimpazdarynyń ishinen 22 oqýshy júldeli orynǵa ilikti. Onyń ishinde 6 altyn, 3 kúmis jáne 13 qola medaldi jeńip aldy.
Qajyrly da qyzyqty kúres barysynda altyn medaldardy fızıka páninen daryndy balalarǵa arnalǵan №8 lıseı-mektebiniń 8, 9, 10, 11 synyp oqýshylary Dinmuhamed Rahymjanov, Anton Draganchýk, Mıras Qoblan jáne Vladımır Lım ıelendi. Al, geografııa páninen – daryndy balalarǵa arnalǵan Abaı atyndaǵy №10 lıseı-mektebiniń 10 synyp oqýshysy Aıajan Eginbaı, hımııa páninen – daryndy balalarǵa arnalǵan №8 lıseı-mektebiniń 11 synyp oqýshysy Vladıslav Cherdansev utyp aldy. 3 kúmis, 13 qolamen qosa, daryndy er balalarǵa arnalǵan «Bilim-Innovasııa» lıseı-ınternatynyń 9, 10, 11 synyp oqýshylary Azamat Atıkeev, Mádı Mádıev, Shámil Erjanov jáne Pavlodar qalalyq №39 mektebiniń 10 synyp oqýshysy Sultan Ilııas pen daryndy qyz balalarǵa arnalǵan «Bilim-Innovasııa» lıseı-ınternatynyń 11 synyp oqýshysy Karına Temirjan «Daryn» RǴPO-nyń «Qurmet gramotasyn» aldy.
Aıta keteıik, oblys oqýshylarynyń komandasy jalpy esepte 3-orynǵa qol jetkizip, «Eń úzdik olımpıadalyq komanda - 2019» ataǵyna ıe boldy.