Naýryzdyń qazaq dalasynda bir kún ǵana emes, toǵyz kún toılanǵanyn ǵalymdar aıta bastady. Oblystyq tilderdi damytý basqarmasy óziniń Tilderdi oqytý ortalyǵymen birigip, Naýryz meıramyn atap ótti.
Osy ujymda isteıtin qyzmetkerdiń endi júrip júrgen kishkentaı Ánýar atty ulynyń tusaýyn kesý qurmetin kópshilik jazýshy Ǵumar Ǵarıfulyna usynypty. Ol kisi sábıdiń tusaýyn kesken soń:
«Bul sábıge aıtarym:
Otanyńdy, týǵan halqyńdy súı!
Seni mápelep ósirgen ata-anańdy súı!,
Er jetkende eseıip,
Elińe eleýli, halqyńa qalaýly bol!
Eshkimniń ala-jibin attamaı,
Janyń taza, peıiliń aq,
Abyroıyń asqan azamat bol!
Basyńa baıandy baq qonsyn,
Otyrǵan ornyń tór men taq bolsyn!
Úlken áýlettiń ıesi atanyp,
Ishi ul men qyzǵa tolsyn!
О́mirde Aıyń solyńnan, Kúniń ońyńnan týsyn!
Jortqanda jodasyń Qydyr bolyp,
Árqashan Qaıyp Eren, qyryq Shilten qorǵap júrsin!
Alla-taǵala ózińdi ot pen sýdan, pále-jaladan, qaıǵy-qasiretten saqtasyn!
Dáýletiń sýdaı tasysyn,
Qosaǵyńmen qosa aǵaryp,
Jasyń júzden assyn!
Osy bergen batamdy Alla qabyl etsin!»
dep batasyn berdi.
– Jasymyz bolsa, birazǵa keldi. Ár jerde menen bata suraıdy. Sony bilemin de, kópshilikke bas qosqanda, osylaı batamdy aldyn ala jazyp ákelemin. Sóıtip, bata berip bolǵan soń, qaltamnan shyǵaryp, álgi batamdy jazǵan bir paraq qaǵazdy jastardyń qolyna ustatyp ketemin. Keıde bata bergen jerińde qalyp ketedi, jurt kóp esine ustamaıdy. Al myna on aılyq sábı erteń óskende anasy oǵan ózine arnalǵan osy batany oqytyp otyrsa, «jaqsy sóz – jarym yrys» degendeı, onyń sanaly, tárbıeli azamat bolyp ósýine yqpaly bolar degen tilek, –deıdi Ǵumar aǵamyz.
Bul da rýhanı jańǵyrýymyzdyń, dástúr-saltty aldaǵy urpaq kádesine jaratýdyń bir kórinisi dep qabyldadyq.
Názıra Járimbet,
«Egemen Qazaqstan»
QOSTANAI