Foreign Policy jýrnalyna suhbat bergen 1992-1995 jyldary AQSh-tyń Qazaqstandaǵy alǵashqy elshisi qyzmetin atqarǵan Ýılıam Kortnı Elbasy N.Nazarbaevtyń Prezıdenttik ókilettigin tapsyrýyna qatysty pikirin bildirdi.
Ýılıam Kortnıdiń aıtýynsha, Táýelsiz Qazaqstannyń jańa kóshbasshysy retinde N.Nazarbaev 1991 jyldan bastap jas memleketke qaýip tóndirgen birqatar daǵdarystan eldi aman alyp shyqty.
«Jańa memleket jer kólemi boıynsha álemde toǵyzynshy orynǵa ıe, munaı qoryna baı. Osy oraıda, Qazaqstanda KSRO-dan qalǵan ıadrolyq qarýdyń túr-túri bolǵanyn aıta ketken jón. Nazarbaev Qazaqstannyń táýelsizdigi nyǵaıýyna eńbek etip, ıadrolyq qarý qoryn AQSh-tyń qoldaýymen Reseıge tapsyrdy. Sodan keıin Chevron, Mobil sekildi kóptegen kompanııamen kelisimge kelip, batysqa qubyr júrgizdi» deıdi Ý.Kortnı.
Sondaı-aq Ý.Kortnı Elbasynyń ıadrolyq qarýdan bas tartý týraly sheshimin joǵary baǵalaıtynyn málimdedi.
«Ol Keńes úkimeti qulaǵannan keıin bılikke kelgen eń kóregen memleket basshysy edi» deıdi 1992-1995 jyldary AQSh-tyń Qazaqstandaǵy alǵashqy elshisi qyzmetin atqarǵan Ýılıam Kortnı. «Ol ıadrolyq qarýdan bas tartý arqyly abyroıǵa ıe boldy. Bul Táýelsiz Qazaqstanǵa qurmetpen qaratýdyń tıimdi tásili edi».
Ý.Kortnıdiń sózine qaraǵanda, kúrdelengen halyqaralyq jaǵdaıda kóshbasshylyq tanytý kelesi prezıdenttiń negizgi baǵyty bolýy tıis.