Astana ákimi qala ataýyn ózgertýge qatysty pikirin bildire otyryp, barlyq bannerler, mańdaıshalar, habarlandyrýlar men basqa da atrıbýtıkany bir kúnde aýystyrý mindetiniń turmaǵandyǵyn málimdedi, dep habarlaıdy elorda ákimdiginiń resmı saıty.
«Eń aldymen, biz memlekettik bıýdjet úshin barynsha únemdi joldy tańdaıtyn bolamyz. Bannerler, mańdaıshalar, habarlandyrý men basqa atrıbýtıkany bir kúnde aýystyrý mindetin bizdiń aldymyzǵa eshkim qoıyp jatqan joq. Qalanyń «Astana-Arena», «Astana-Opera» sııaqty nysandary, sporttyq klýbtary óz ataýlaryn ózgertpeıdi. «Astana» sózi bárimizge yńǵaıly. Ol memlekettiń elordasy degen maǵynany bildiredi. Qazaq tilinde elorda turǵyndaryn «astanalyqtar» dep ataıdy. Biz olardy orys tilinde de burynǵydaı ataýdy usynamyz», – dedi Sultanov.
Sonymen qatar, ol álemdegi kórnekti memlekettik qaıratkerlerdiń esimimen atalatyn birneshe qalany mysalǵa keltirdi. «AQSh sııaqty alyp memlekettiń astanasynyń ózi de eldiń Tuńǵysh prezıdentiniń esimimen atalǵan. Sondaı-aq, Hoshımın, Sankt-Peterbýrg, Djordjtaýn sııaqty dúnıejúzinde ondaǵan qala bar», – dep atap ótti ol. Elorda ákiminiń aıtýynsha, el astanasynyń eski ataýy jazylǵan jeke jáne zańdy tulǵalardyń resmı qujattary óz kúshin joımaıdy. HQKO-na baryp, olardy aýystyrý qajet emes. «Qujattar tek olardyń merziminiń ótýi nemese joǵalýy sebepterimen ǵana aýystyrylatyn bolady», – dep málimdedi Sultanov.
Buǵan deıin habarlaǵanymyzdaı, keshe Qazaqstan Prezıdenti Qasym-Jomart Toqaev Astana qalasyn Nur-Sultan qalasy dep qaıta ataý týraly jarlyqqa qol qoıǵan-dy.