Qazaqstan Respýblıkasynyń Prezıdenti laýazymyna kirisýine oraı, Qasym-Jomart Toqaevtyń atyna quttyqtaý jedelhattary men hattar kelip túsýde.
Amerıka Qurama Shtattarynyń Prezıdenti Donald Tramp Qazaqstannyń Tuńǵysh Prezıdenti – Elbasy Nursultan Nazarbaevpen birlesken jumysyn joǵary baǵalaı kelip, Qasym-Jomart Toqaevpen de osyndaı jemisti qarym-qatynas qalyptasatynyn asyǵa kútetinin atap ótken.
«Men Sizdi elińizdiń Prezıdenti laýazymyna kirisýińizben quttyqtaǵym keledi, sondaı-aq Naýryz meıramynda Sizge, otbasyńyz ben Qazaqstan halqyna qýanysh pen ósip-órkendeý tileımin. Osy kúnderi kóptegen amerıkalyqtar men álem halyqtary da osy tamasha jańarý meıramyn atap ótýde. Biz elderimiz arasyndaǵy qatynastarda úlken tabystarǵa qol jetkizdik jáne men olardyń damýy jalǵasatynyna qýanyshtymyn. Amerıka halqy men bıznesiniń Qazaqstanmen ekonomıkalyq yntymaqtastyqty damytý úshin jańa baǵyttardy izdeýin jalǵastyryp jatqanyn da alǵaýsyz aq kóńilimmen baqylap otyramyn. Naýryz qutty bolsyn!», – delingen jedelhatta.
Belgııa Koroli Fılıpp Qasym-Jomart Toqaevty Qazaqstan Prezıdenti laýazymyna kirisýimen quttyqtaıdy jáne joǵary memlekettik qyzmette úlken tabystarǵa jetýine shyn júrekten tilektestigin bildiredi.
AQSh Memlekettik departamenti resmı ókiliniń orynbasary Robert Palladıno óziniń málimdemesinde Qazaqstannyń Tuńǵysh Prezıdenti – Elbasy Nursultan Nazarbaevtyń AQSh pen Qazaqstan arasyndaǵy berik te serpindi qatynastarynyń qalyptasýy men damýyna qosqan úlesin joǵary baǵalaıdy.
«Qazaqstan úshin osyndaı tarıhı kúnde biz zamanaýı, egemen jáne ósip-órkendegen Qazaqstannyń negizin qalaýshy retindegi eńbegi zor dep sanaımyz jáne onyń úlgili óńirlik jáne jahandyq aýqymda kórsetken jaýapkershilikti basshylyǵyn moıyndaımyz.
Biz sonymen qatar onyń ıadrolyq taratpaý salasyndaǵy aıtarlyqtaı eńbegine, denýklearızasııa jónindegi jahandyq kúsh-jiger jumsaýdaǵy kóshbasshylyǵyna, bılikti beıbit jolmen berýdegi úlgili is-áreketine jáne Qazaqstandaǵy, sondaı-aq tutastaı óńirdegi beıbitshilik pen ósip-órkendeýdi qamtamasyz etý isine qosqan úlesine tańǵala otyryp rızashylyǵymyzdy bildiremiz.
Biz Qazaqstannyń jańa Prezıdenti Qasym-Jomart Toqaevty quttyqtaımyz jáne eki memleket arasyndaǵy keń kólemdi strategııalyq áriptestikti tereńdetý boıynsha birlesken jumystar jalǵasady dep úmittenemiz. Sondaı-aq bizderdiń ekonomıkalyq damý, saýda-sattyq pen ınvestısııalar, óńirlik jáne jahandyq qaýipsizdikti qamtamasyz etýdegi uzaq merzimdi ózara múddelerimiz jalǵasady dep senemiz», – delingen málimdemede.
Germanııa Federatıvtik Respýblıkasynyń Prezıdenti Frank-Valter Shtaınmaıer Qazaqstan men Germanııany áriptestik qatynastar baılanystyratynyn, al ekijaqty yntymaqtastyq kópqyrly jáne serpindi baılanystardyń berik irgetasyna negizdelgenin atap kórsetedi. GFR Prezıdenti Qazaqstannyń óńirde aıtarlyqtaı jáne jaýapkershilikti ról atqarýyn jalǵastyratynyna jáne Germanııanyń seriktesi bolyp qalatynyna senim bildiredi.
Italııa Respýblıkasynyń Prezıdenti Serdjo Mattarella Italııa halqynyń jáne jeke óziniń atynan Qasym-Jomart Toqaevty Qazaqstan Respýblıkasynyń Prezıdenti laýazymyna taǵaıyndalýymen quttyqtap, Qazaqstan úshin mańyzdy osy tarıhı kezeńde joǵary mandatyn tabysty oryndaýǵa tilektestigin bildiredi.
«Sizdiń mandatyńyz barysynda Qazaqstan men Italııa arasyndaǵy qatynastar ekijaqty formatta da, sondaı-aq Eýroodaqpen qatynastar aıasynda da keń ári kópqyrly negizde nyǵaıa beredi dep úmittenemin», delingen quttyqtaý hatynda.
Majarstan Prezıdenti Iаnosh Ader óziniń jedelhatynda majar jáne qazaq halyqtary arasyndaǵy izgi dostyqty saqtaý men nyǵaıtý birinshi kezektegi mańyzǵa ıe ekenin aıta kelip, Majarstannyń eki el arasyndaǵy jaqyn qatynastar men ózara qurmetke qurylǵan yntymaqtastyqty ári qaraı damytýǵa daıyn ekenin atap kórsetedi.
Ýkraına Prezıdenti Petr Poroshenko Qasym-Jomart Toqaevtyń kásibıligi men ómirlik tájirıbesi Qazaqstannyń ári qaraı damýyna, memleket retinde irgesi bekı túsýine jáne halyqaralyq arenadaǵy bedelin bekemdeýge yqpal etetinin atap ótedi.
«Ortaq kúsh-jiger nátıjesinde qol jetkizilgen dostyq pen ózara qurmet bizdiń elderimizdi ári qaraı da ózara tıimdi yntymaqtastyqqa jetelep, ekijaqty jáne halyqaralyq mindettemelerimizdi naqty oryndaýǵa alǵyshart jasaıtynyna senemin», – delingen jedelhatta.
Majarstan Premer-mınıstri Vıktor Orban óziniń hatynda majar úkimeti aldaǵy ýaqytta da Qazaqstanmen kópjaqty strategııalyq yntymaqtastyqty damytýǵa baǵyt ustanatynyna sendiredi.
Birikken Ulttar Uıymynyń Bas hatshysy Antonıý Gýterrısh Qasym-Jomart Toqaevty Qazaqstan Respýblıkasynyń Prezıdenti laýazymyna kirisýimen quttyqtaı kelip, BUU júıesinde úlken qurmetke ıe adamnyń osyndaı laýazymǵa taǵaıyndalǵany tek rızashylyq sezimin týdyratynyn erekshe ataıdy.
«Sizben tyǵyz yntymaqtastyqty asyǵa kútemin. О́zara túsinistigimiz Qazaqstannyń Syrtqy ister mınıstri bolyp turǵan kezińizde qurylýyna ózińiz atsalysqan BUU-nyń Ortalyq Azııadaǵy О́ńirlik ortalyǵy qyzmeti aıasynda da jalǵasatynyna esh kúmán keltirmeımin. Qazaqstan óz halqy men Ortalyq Azııa halyqtarynyń ósip-órkendeýi úshin de Ornyqty damý maqsattarynyń belsendi jaqtaýshysy rólin saqtap qalady dep úmittenemin», – delingen quttyqtaý hatynda.
Sondaı-aq Qasym-Jomart Toqaevtyń atyna Qazaqstan Prezıdentiniń laýazymyna kirisýine oraı quttyqtaý hattary men jedelhattaryn Polsha Respýblıkasynyń burynǵy prezıdenti Aleksandr Kvasnevskıı, UQShU Bas hatshysynyń mindetin atqarýshy Valerıı Semerıkov, BUU Bas hatshysynyń orynbasary Iýrıı Fedotov, Túrki tildes memleketter yntymaqtastyq keńesiniń Bas hatshysy Baǵdat Ámireev, Iаdrolyq synaqtarǵa jappaı tyıym salý týraly shart uıymynyń Atqarýshy hatshysy Lassına Zerbo, Halyqaralyq energetıka hartııasynyń Bas hatshysy Ýrban Rýsnak, Horvatııanyń burynǵy syrtqy ister mınıstri Býdımır Lonchar, Rýmynııa Parlamenti depýtattary palatasy tóraǵasynyń orynbasary Florın Iordake, Búkilálemdik óner jáne ǵylym akademııasynyń Qurmetti prezıdenti Ivo Shpaýs, Jeneva Dıplomatııa jáne halyqaralyq qatynastar mektebiniń prezıdenti Kolým Merfı, sondaı-aq BUU-nyń Ortalyq Azııa boıynsha Bosqyndar isteri jónindegi agenttiginiń óńirlik ókildiginiń burynǵy óńirlik úılestirýshisi Saber Azam da joldady.