Elbasy Nursultan Nazarbaevtyń atyna Qazaqstan Respýblıkasynyń Prezıdenti ókilettigin toqtatýyna baılanysty qazirgi jáne burynǵy memleket basshylarynan, sondaı-aq halyqaralyq uıymdardyń jetekshilerinen jedelhattar men hattar kelip túsýde.
Qytaı Halyq Respýblıkasynyń Tóraǵasy Sı Szınpın óziniń hatynda Qytaı men Qazaqstannyń jan-jaqty strategııalyq seriktestigin ornatýǵa, «Bir beldeý, bir jol» jobasyn birlese júzege asyrýǵa baılanysty yntymaqtastyqty nyǵaıtý isindegi Qazaqstannyń Tuńǵysh Prezıdentiniń tarıhı rólin atap ótken.
«Sizdi Qazaqstannyń negizin qalaýshy tulǵa jáne barsha Qazaqstan halqynyń qoldaýyna ıe bolǵan Ult kóshbasshysy dep bilemiz. 30 jyl ishinde Qazaqstan halqy Sizdiń basshylyǵyńyzben kóptegen qıynshylyqty eńserip, táýelsiz, demokratııalyq, órkendegen, baı ári qýatty Qazaqstan Respýblıkasyn qura bildi. Aldaǵy ýaqytta da Qazaqstannyń Siz aıqyndap bergen saıası baǵytty ustanyp, jańa tabystarǵa jetetinine, sondaı-aq qarqyndy damı túsetinine senimdimin», – delingen hatta.
AQSh-tyń Memlekettik departamenti joldaǵan málimdemede Qurama Shtattary Tuńǵysh Prezıdent Nursultan Nazarbaevtyń AQSh pen Qazaqstan arasyndaǵy berik ári jaqsy qarym-qatynastardy ornatýǵa jáne damytýǵa sińirgen eńbegin joǵary baǵalaıtyny aıtylǵan.
«Qazaqstan úshin osyndaı tarıhı sátte biz Nursultan Nazarbaevty zamanaýı, egemen ári órkendegen Qazaqstannyń negizin qalaýshy tulǵa retinde tanıtynymyzdy jetkizemiz jáne onyń óńirlik ári jahandyq deńgeıdegi jaýapty basshy retindegi kórsetken jolyn úlgi tutamyz.
Biz onyń ıadrolyq qarýdy taratpaý máselesine qatysty zor eńbegin jáne jahandyq qarýsyzdaný úderisindegi kóshbasshylyǵyn, bılikti beıbit jolmen berý isinde kórsetken adaldyq úlgisin, sondaı-aq Qazaqstandaǵy jáne jalpy óńirdegi beıbitshilik pen órkendeý isin qamtamasyz etýge qosqan úlesin joǵary baǵalaımyz», – delingen úndeýde.
Belgııa Koroli Fılıpp óziniń jedelhatynda Nursultan Nazarbaevtyń tarıhı eńbegin atap ótip, Elbasynyń atyna jáne Qazaqstan Respýblıkasyna óziniń jyly lebizin bildirgen.
«Men mazmundy kezdesýlerimizdi árdaıym baǵalaımyn. Sol kezde Sizdiń Qazaqstandy jan-jaqty damytýǵa shynaıy berilgendigińizdi óz kózimmen kórdim. Siz Prezıdent bolǵan kezdegi elderimiz arasynda ornaǵan dostyq qatynastar odan ári nyǵaıa túsedi dep úmittenemin», – delingen málimdeme mátininde.
Serbııa Respýblıkasynyń Prezıdenti Aleksandr Výchıch Qazaqstannyń Tuńǵysh Prezıdenti aldaǵy ýaqytta da elimizdiń damýyna zor úles qosa beretinine senim bildirdi.
«Sizder jańa Qazaqstandy qurý jolynda tań qalarlyq tabysqa qol jetkizdińizder. Siz aıqyn maqsat-mindetter men qajymas erik-jigerińizdiń arqasynda ulttyq birlikti, rýhanı qundylyqtardy nyǵaıtý, sondaı-aq ishki reformalardy júzege asyrý isinde zor jetistikke jettińiz. Osylaısha, saıası turaqtylyqty jáne elińizdiń ornyqty ekonomıkalyq damýyn qamtamasyz ettińiz», – delingen A.Výchıchtiń hatynda.
Ýkraına Prezıdenti Petr Poroshenko óz eliniń jáne jeke óziniń atynan Ýkraına men Qazaqstan qatynastaryn damytý isine qosqan úlesi úshin Nursultan Nazarbaevqa rızashylyq bildirdi.
«Sizdiń kópqyrly qyzmetińizdiń táýelsizdikti qalyptastyryp, zamanymyzdyń túrli saıası jáne ekonomıkalyq syn-qaterlerine tótep berýi, sondaı-aq óńirdiń ozyq damyǵan elderiniń birine aınalǵan Qazaqstan Respýblıkasynyń damýy men nyǵaıýy úshin mańyzy zor», – delingen jedelhatta.
Tatarstannyń Tuńǵysh Prezıdenti, Tatarstannyń memlekettik keńesshisi Mıntımer Shaımıev Qazaqstannyń Tuńǵysh Prezıdenti Nursultan Nazarbaevpen berik dostyǵyn maqtan tutatynyn atap ótken jáne ókilettigin toqtatý jóninde qabyldanǵan sheshimdi qysqa merzim ishinde búkil álem moıyndaǵan memleketti – Qazaqstandy qurǵan adamnyń mańyzdy qadamy retinde baǵalaǵan.
Nursultan Nazarbaevqa ózderiniń jyly lebizderin, sondaı-aq, Uly Lıýksembýrg Gersogtiginiń Premer-Mınıstri Ksave Bettel jáne Sıngapýr Respýblıkasynyń Premer-Mınıstri Lı Sıan Lýn joldady.
Sonymen qatar, rızashylyq pen jyly lebizin jetkizgen jedelhattardy burynǵy memleket jáne úkimet basshylary da joldady. Solardyń qatarynda Polsha Respýblıkasynyń burynǵy prezıdenti Aleksandr Kvasnevskıı, Horvatııa Respýblıkasynyń burynǵy prezıdenti Stepan Mesıch, Avstrııa Respýblıkasynyń burynǵy prezıdenti Haıns Fısher, Germanııa Federatıvtik Respýblıkasynyń burynǵy kansleri Gerhard Shrıoder, Fransııa Respýblıkasynyń burynǵy premer-mınıstri Fransýa Fııon bar.
Halyqaralyq uıymdardyń jáne kompanııalardyń basshylary men tóraǵalarynan kóptegen hattar kelip tústi. Bul hattarda Qazaqstan Respýblıkasynyń Tuńǵysh Prezıdentiniń kóp jaqty yntymaqtastyqty jáne jahandyq ornyqty damýdy, sondaı-aq beıbitshilik pen qaýipsizdikti odan ári nyǵaıtýǵa baǵyttalǵan bastamalardy belsendi túrde ilgeriletý jónindegi dáıekti saıasaty erekshe atap ótilgen.
Hat avtorlarynyń qatarynda Eýropalyq komıssııa tóraǵasy Jan-Klod Iýnker, BUU Bas hatshysy Antonıý Gýterrısh, Shanhaı Yntymaqtastyq Uıymynyń Bas hatshysy Vladımır Norov, Eýrazııa ekonomıkalyq komıssııa alqasynyń tóraǵasy Tıgran Sarkısıan, Ujymdyq qaýipsizdik shart uıymy Bas hatshysynyń mindetin atqarýshy Valerıı Semerıkov, BUU Bas hatshysynyń orynbasary, BUU Vena bólimshesiniń Bas dırektory, BUU Esirtki jáne qylmys jónindegi basqarmasynyń atqarýshy dırektory Iýrıı Fedotov, Halyqaralyq energetıkalyq hartııanyń Bas hatshysy Ýrban Rýsnak, Iаdrolyq synaqtarǵa jalpyǵa birdeı tyıym salý týraly shart uıymy Daıyndyq komıssııasynyń atqarýshy hatshysy Lassın Zerbo, kanadalyq «Kameko» kompanııasynyń prezıdenti ári bas dırektory, Qazaqstan Respýblıkasynyń Prezıdenti janyndaǵy Sheteldik ınvestorlar keńesiniń múshesi Tım S.Gıtsel, «Zemlıachestvo nemsev v Rossıı» atty jastar uıymynyń tóraǵasy Valter Gaýks, sondaı-aq Domınıkan Respýblıkasynyń Syrtqy ister mınıstrligi bar.
Sonyń ishinde, Eýropalyq komıssııa tóraǵasy Jan-Klod Iýnker Nursultan Nazarbaevtyń atyna joldaǵan hatynda Qazaqstannyń búginde Eýropa odaǵynyń negizgi ekonomıkalyq jáne saıası seriktesi ekeni jáne onyń Qazaqstannyń Tuńǵysh Prezıdentiniń arqasynda múmkin bolǵany aıtylǵan.
«Biz bir-birimizdi kóp jyldan beri bilemiz. Men Sizdiń Eýropa men Azııa arasyndaǵy syndarly ári tyǵyz qarym-qatynastarǵa adaldyǵyńyzdy, sondaı-aq óńirde jáne odan tys jerlerdegi Sizdiń rólińizdi joǵary baǵalaımyn», – delingen jedelhatta.
BUU Bas hatshysy Antonıý Gýterrısh óziniń hatynda: «Qazaqstan Siz Prezıdent laýazymyna kelgen kezden beri beıbitshilik pen qaýipsizdikti saqtaýǵa, ıadrolyq qarýdy taratpaýǵa, terrorızmge qarsy is-qımyldarǵa qatysty BUU-nyń qundylyqtaryn qorǵaý jáne ilgeriletý isinde mańyzdy ról atqara bastady. Ornyqty damý maqsattarynyń jaqtaýshysy retinde Qazaqstannyń rólin joǵary baǵalaımyn», – dep atap ótken.
Qazaqstan Respýblıkasynyń Tuńǵysh Prezıdenti – Elbasy barlyq hattarmen tanysyp, hat ıeleriniń jyly lebizderi men quttyqtaýlary úshin rızashylyq bildirdi.