Naýryz merekesi qarsańynda Elbasy Nursultan Nazarbaev pen Prezıdent Qasym-Jomart Toqaev «Táýelsizdiktiń 25 jyldyǵy» monýmenti aldynda ornalasqan etnoaýylǵa bardy. Etnoaýyl aýmaǵynda teatrlandyrylǵan kórinister, ulttyq sport túrleri boıynsha saıystar, qolónershiler kórmesi jáne ulttyq salt-dástúrdi dáripteıtin sharalar uıymdastyryldy.
EKSPO aýmaǵynda uıymdastyrylǵan Naýryz meıramyna oraı alańda 17 kıiz úı tigilip, altybaqandar quryldy. Qazaqtyń ulttyq salt-dástúrlerin, teatrlandyrylǵan kórinisterdi, aıtysty, qazaq estradasynyń juldyzdary qoıǵan konsertti tamashalaý úshin qala turǵyndary tańerteńnen bastap keshen aýmaǵyna qaraı aǵyla bastady. Ulttyq merekeni toılaýǵa kelgen kópshilikti batyrlardyń saýyt-saımanyn asynǵan boıshań jigitter men ulttyq kıim kıgen arýlar qarsy aldy. Keshenge aǵylǵan qala turǵyndary ár jerde qurylǵan saıys alańdaryna jınalyp, ulttyq oıyndardy tamashalady. Onyń ishinde jigitter qaýymy kúresip, gir tasyn kóterip, qol kúrestirip ózara baq synassa, balalar asyq oınap, bozbala men boıjetkender altybaqan mańynda bas qosty. Etnoaýylda uıymdastyrylǵan qazaqtyń ulttyq oıyndaryn qyzyqtap máz-meıram bolǵandardyń da qatary qalyń. Jıylǵan halyq naýryz kóje men ystyq baýyrsaqtan jáne ózge de ulttyq taǵamdardan dám tatyp, máre-sáre kúıde boldy.
Ulyq merekeni halyqpen birge toılaýǵa kelgen Elbasy Nursultan Nazarbaev pen Prezıdent Qasym-Jomart Toqaev qazaqstandyqtardy Naýryz merekesimen quttyqtap, elimizge baq-bereke tiledi.
Jınalǵan kópshilik birge kelgen Tuńǵysh Prezıdent pen Memleket basshysyn qaýmalaı qorshap, jappaı sýretke túsip, quttyqtaýlaryn jetkizdi.
Naýryz toıynda elordada nekelerin qıǵan 9 juptyń erekshe joly boldy desek qatelespeımiz. Shańyraq kótergen elordalyq jastarǵa Nursultan Nazarbaev aq batasyn berdi. Elbasy jas otbasylardy este qalarlyq mańyzdy kúnderimen quttyqtap, olarǵa baqytty uzaq ómir tiledi.
– Senderge baqyt tileımin! Mahabbattaryń esh ýaqytta sónbesin. Aldaryń ashyq bolsyn. Balaly-shaǵaly, úbirli-shúbirli bolyńdar! Ata-analaryńa qýanysh ákelińder. Eldiń azamaty bolyńdar! – dedi Nursultan Nazarbaev. Naýryz toıy men el esinde qalatyn tarıhı sátterde otbasyn qurǵan jastardyń qýanyshtarynda shek joq.
Merekeni toılaýǵa kelgen kópshiliktiń ishinde Parlament depýtattary men Úkimet músheleri de bar. Aıtýly sharada Premer-Mınıstr Asqar Mamın, Parlament Májilisiniń Tóraǵasy Nurlan Nyǵmatýlın, Prezıdent ákimshiliginiń basshylyǵy, sondaı-aq Astana qalasynyń ákimi Baqyt Sultanov boldy.
Merekege kelgen Premer-Mınıstrdiń orynbasary Gúlshara Ábdiqalyqova Naýryz meıramynyń mańyzy erekshe ekenin atap ótip, bul kúni adamdar arasyndaǵy ókpe-renishtiń keshirilip, tatýlyq pen baq-bereke ornaıtyn jańa kún týatynyn aıtty.
– Naýryz – bul jańarý meıramy. Barshaǵa málim elimizde aıtýly oqıǵalar oryn alýda. Elbasy bastaǵan strategııa ári qaraı jalǵasyn taba bermek. Memleket basymdyq bergen salalardyń barlyǵy josparly kezeń boıynsha júzege asady. Ulttyq merekemiz qarsańynda yrys artyp, tolaıym tabystarǵa jete bereıik, – dedi ol.
Kópshilikti Ulystyń uly kúnimen Prezıdent Ákimshiligi ishki saıasat bóliminiń meńgerýshisi Aıda Balaeva da quttyqtady.
– Bıylǵy Naýryz meıramy erekshe. Aýa raıy da meıirin tógip, halyq kóterińki kóńil kúıde júr. Ulystyń uly kúni qarsańynda elimizde aıtýly oqıǵalar bolýda. Búgin Qazaqstannyń árbir turǵyny bolashaǵyn elordamen baılanystyrǵysy keledi. Astananyń irgetasyn qalaýda Elbasynyń sińirgen eńbegi zor. Ol kisiniń halqyna degen mahabbatynan, ystyq yqylasynan týǵan Astana – búginde álemge aty málim shahar. Sondyqtan meniń oıymsha, oǵan Elbasynyń esimin berý zańdylyq, – dedi ol.
Qazaqstandyqtardy Ulystyń uly kúnimen Eńbek jáne halyqty áleýmettik qorǵaý mınıstri Berdibek Saparbaev ta quttyqtady. «Naýryz merekesimen quttyqtaımyn! Eń bastysy, elimizde tynyshtyq bolsyn! Barlyq otbasyna baqyt tileımin. Bıyl Ulystyń uly kúni merekesin qazaq eli aýqymdy ózgeristermen qarsy alyp otyr. Eldiń ordasy atanǵan Astanaǵa Elbasynyń esimin berý laıyqty ári durys sheshim. Elbasynyń eńbegin laıyqty baǵalaý kerek, qıyn kezeńde, ıaǵnı 90-shy jyldary jańa astanany qurý týraly sheshim qabyldaý, mundaı zor jaýapkershilik alý ərkimniń qolynan kele bermeıdi. Ol úshin úlken júrek pen tabandylyq, senimdilik bolý kerek. Jastar óz Otanyn, ultyn, memleketin súıip ósýi kerek jəne elge eńbek etken adamdardy da esh ýaqytta umytpaýymyz qajet. «Tarıhsyz bolashaq bolmaıdy» dep aıtamyz ǵoı, osy oraıda 20 naýryz kúni mańyzdy sheshim qabyldandy dep oılaımyn, – dedi Berdibek Saparbaev.
Astana qalasy Mádenıet jáne sport basqarmasynyń basshysy Bolat Majaǵulov ta ıgi tilegin jetkizip, elordanyń jańa ataýyn qalaı qabyldaǵanyn aıtty. «Barsha qazaq elin Ulystyń uly kúnimen quttyqtaımyn. Bul jyl bizge tek tabys ákelsin. Elimizde aıtýly ózgerister boldy. Qalaı bolǵanda da, halyq birigip, el-jurt bolyp jańa Prezıdentti qoldap, Elbasymyzdy ulyqtap, Naýryz merekesin atap ótip jatyrmyz. О́z basym Astana ataýyn ózgertýdi qoldaımyn. Bul Elbasynyń bastaǵan bastamasy, ol kisiniń eńbegi zor. Búgingi Astana, búgingi Nur-Sultan qalasy búkil Qazaqstannyń brendi», – dedi ol.
Belgııa Koroldiginiń Qazaqstandaǵy elshisi Aleksı de Krombrıýghe Naýryz ǵajaıyp mereke ekenin aıtady. «Halyqtyń barlyq salt-dástúrin, ulttyq kıimderin tamashalap júrgenniń ózi ádemi. Bul endi sýyq qystan keıingi jurttyń jadyraýy ǵoı. Onyń ústine qalalaryńyzdyń aty da jańaryp jatyr. Men de elime endi Astanadan emes, Nur-Sultannan habar beremin», dedi elshi.
Etnoaýylǵa jınalǵan qala turǵyndarynyń da kóńili shat-shadyman. Bir-birimen kórisken jurt qazaqtyń jańa jylynda aqjarma tilekterin jaýdyryp jatty. Qala turǵyny Aıtova Janat:
– Bıyl biz úshin erekshe jańa jyl bolǵaly tur. Táýelsizdiktiń tájin kıgennen beri táı-táı basqan jas balany jetektep, jetistikterge jetelegendeı, memleketimizdi bıik beleske jetkizgen Elbasymyz Prezıdenttik ókilettigin toqtatty. Ol kisiniń eńbegi ushan-teńiz. Álemge qazaq halqyn tanytyp, halyqtyń jaǵdaıy jaqsardy. Osy oraıda Astanaǵa Elbasynyń ataýyn berýdi oń sheshim dep qabyldadyq. Jańa Prezıdenttiń kelýinen halyq jaqsylyqqa bastaıtyn ózgerister kútedi. Halqymyz ósip-órkendep, áleýmettik turǵyda izgi bastamalar qolǵa alynady degen senim bar. Naýryzben kelgen ózgerister ońynan bolǵaı, dedi.
Kún men túnniń teńelip, jan-dúnıeni tiriltken, sharýanyń bir maly ekeý bolyp, arqa-basy keńip, aqqa aýzy tıgen, qytymyr qystyń yzǵarynan qutylyp, aldaǵy shýaqty kúnderden úmittendirgen Naýryz merekesi Táýelsiz elimizdiń zor yqylaspen toılanatyn naǵyz halyqtyq sıpattaǵy saltanatyna aınaldy. Bul mereke halqymyzdyń, táýelsizdigimizdiń eń negizgi tamyrynyń biri sanalady.
Elbasy Nursultan Nazarbaevtyń Jarlyǵymen 2010 jyldan beri Qazaqstanda Naýryz meıramy úsh kún – 21-23 naýryz aralyǵynda toılanyp keledi.
Erkejan AITQAZY,
«Egemen Qazaqstan»