Prezıdent Qasym-Jomart Toqaevtyń «Qazaqstan Respýblıkasynyń astanasy – Astana qalasyn Qazaqstan Respýblıkasynyń astanasy – Nur-Sultan qalasy dep qaıta ataý týraly» Jarlyǵyn Qaraǵandy oblysynyń jurtshylyǵy zor qurmet, ystyq yqylaspen qabyl aldy. Munyń basty sebebiniń biri – qaraǵandylyqtar Tuńǵysh Prezıdenttiń Temirtaýda eńbekpen shyńdalyp, qazynaly Qaraǵandyda qaıratker tulǵa bolyp qalyptasqanyn oryndy maqtan etedi.
Elbasynyń ózi de Qaraǵandy topyraǵyn «Eńbek Otanym» dep úlken tebirenispen, aıryqsha qurmetpen ataıtyny belgili. Sondyqtan da bolar, jańa ataýdy qoldaý jónindegi jalpyhalyqtyq sıpatqa ıe bolǵan aksııa barysynda qaraǵandylyqtardyń belsendiligi óte joǵary deńgeıde dep aıtýǵa bolady.
Keshe kenshiler qalasyndaǵy ortalyq saıabaqta Astana qalasynyń Nur-Sultan bolyp qaıta atalýyn qoldaýǵa arnalǵan konsert uıymdastyryldy. Mádenı sharada el estradasynyń tanymal ókilderi men jergilikti ánshiler saıabaqqa jıylǵan jurtshylyq aldynda óner kórsetti.
Sonymen qatar, Elbasy óziniń eńbek jolyn bastap, sharbolattaı shyńdalyp shyqqan burynǵy Qaraǵandy metallýrgııalyq kombınatynda, qazirgi «ArselorMıttal Temirtaý» kásipornynda da atalǵan ózgeristerdi qoldaǵan arnaıy aksııa uıymdastyryldy.
Jalpy, Astana qalasynyń Nur-Sultan qalasy bolyp qaıta atalýyn alǵashqylardyń biri bolyp Qaraǵandy oblysynyń sportshylary qoldaǵan bolatyn. Olar aksııa barysynda «Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń bizdiń elge sińirgen eńbegi zor. Biz, Qaraǵandy oblysynyń sportshylary Elbasymyzǵa Qazaqstan sportyna kórsetken qoldaýy, memleketimizdi nyǵaıtý jolyndaǵy eńbegi úshin alǵys aıtamyz. Astanamyzdy Tuńǵysh Prezıdent qurmetine ataý quptarlyq sheshim, buǵan Elbasymyzdyń eńbegi sińdi. Qazaqstan sportshylarynyń esimi tarıhqa altyn áriptermen jazyldy. Eger Nursultan Ábishuly qoldaý kórsetpegende, biz mundaı jeńisterge jetpes edik», degen úndeý taratqan bolatyn.
Budan bólek, óńirdiń ustazdar qaýymy men densaýlyq salasynyń qyzmetkerleri de óz pikirlerin bildirip, ıgi ózgeristerdi shyn nıetpen qoldaıtyndyqtaryn jetkizdi. Mundaı bastamaǵa oblystyń qalalary men aýdandaryndaǵy túrli salanyń ókilderi de qyzý qoldaý bildirip, ún qosty.
Mundaı ıgi sharadan aımaqtyń jastary da shet qalmady. Mysaly, oblys ortalyǵyndaǵy joǵary oqý oryndary men kolledjderdiń stýdentteri Tuńǵysh Prezıdent bilim alǵan Qaraǵandy memlekettik tehnıkalyq ýnıversıtetiniń aldynda «Elbasy, rahmet» fleshmobyn uıymdastyrdy. Stýdent jastar sap túzý arqyly«Elbasy» degen jazýdy qurap, barlyǵy biraýyzdan «Rahmet!» dep urandatty.
«Nur-sultan – jańa dáýir sımvoly bolýǵa ábden laıyq qala», deıdi bolashaqqa úmitpen qaraǵan Qaraǵandy halqy – Elbasynyń Eńbek Otanynyń turǵyndary.
Qaırat ÁBILDA,
«Egemen Qazaqstan»
QARAǴANDY