Ortalyq memlekettik mýzeı Almatydaǵy Majarstan bas konsýldyǵymen birlese otyryp «Buǵylar joly» atty kerim kórikti fotokórmesin óz kórermenderine usyndy.
Ortalyq mýzeı men Majarstan bas konsýldyǵy arasyndaǵy mádenı yntymaqtastyq baılanys jyldan-jylǵa nyǵaıa túsýde. Máselen, sońǵy jyldardyń ózinde mýzeıge kelýshiler Majarstannyń tarıhy, mádenıeti týraly syr shertken: «Majarstan ǵylymynyń merekesi», «Majarstan shyǵystanýshylary» syndy kórmelermen tanysty. Qalyptasqan dástúrdi jalǵastyrǵan Ortalyq mýzeı Majarstan bas konsýldyǵymen birlesip «Buǵylar joly» kórmesin kelýshilerdiń nazaryna usyndy. Kórme ańshylyq jáne tabıǵatty qorǵaýmen kásibı túrde aınalysatyn Odon Blaýmannyń foto shyǵarmashylyǵyna arnaldy.
Kórmeden jabaıy ańdardyń ómir súrý ortasyndaǵy túrli sátterin beıneleıtin túsirilimderdi tamashalaýǵa bolady. Fotosýretshiniń shyǵarmashylyq taqyryby bul joly Majar eliniń maqtanyshy, tabıǵatynyń injý-marjany buǵylar men elikterge arnalǵan. Odon Blaýman tek qana fotosýretshi emes, sonymen qatar kınotúsirilimdermen de aınalysady. Qazirgi tańda sýretshi DVD formatta 55 fılm túsirip, kórermenderge tartý etti. Fılmder Aýstrııa, Germanııa, Nıderland, Italııa, Belgııa elderinde kórsetilip zor qoshemetke ıe bolǵan. Onyń fılmderi «Ańshylyq, balyq aýlaý» telearnasynda jıi kórsetiledi. Blaýman ańshylyq mektepteri úshin birqatar arnaıy oqý fılmderin jáne ańshylyq kásibimen aınalysatyn kompanııalardyń jarnamalaryn túsirdi.
Kórme ekspozısııasynda kelýshiler tańyrqaı qaraıtyn kánigi fotosýretshi Odon Blaýmannyń 65 týyndysy bar. Onyń árqaısysy Vengrııanyń ásem tabıǵaty, janýarlar álemimen tanystyrady. Alys Alpi taýyn jańǵyryqtyrǵan únderi, jer tarpyǵan sátteri kóz aldyńa elesteıdi. Nege ekenin buǵylardyń tamsandyratyn keıpin ózgeshe bir ińkárlikpen áspettegenin kóresiz.
Buǵylardyń tańsyq joly sizdiń de tańdaıyńyzdy qaqtyratyny ras.
Saparbaı PARMANQUL,
«Egemen Qazaqstan»
ALMATY