Inflıasııa boıynsha nysanaly baǵdar 2022 jyldan bastap 3-5 paıyzǵa deıin tómendetiledi. Bul týraly búgin Úkimet otyrysynda «Úkimet pen Ulttyq Bank arasyndaǵy 2019 jylǵa arnalǵan makroekonomıkalyq saıasat sharalaryn úılestirý týraly kelisimi jóninde» baıandaǵan QR Ulttyq bank tóraǵasy Erbolat Dosaev aıtty, dep habarlaıdy QazAqparat tilshisi.
«Tuńǵysh Prezıdent - Elbasy Nursultan Ábishuly Nazarbaevtyń memlekettik baǵdarlamalar men qurylymdyq reformalardy iske asyrý boıynsha Qazaqstan Respýblıkasy Prezıdenti Qasym-Jomart Kemeluly Toqaevtyń tapsyrmasyn oryndaý maqsatynda Ulttyq bank Úkimetpen 2019 jylǵa arnalǵan makroekonomıkalyq saıasat sharalaryn úılestirý týraly kelisimge qol qoıý boıynsha bastama jasaıdy. Kelisimde Úkimet pen Ulttyq banktiń ekonomıkanyń ornyqty ósýin qamtamasyz etý jáne baǵalardyń turaqty deńgeıin qoldaý boıynsha birlesken qyzmetiniń qaǵıdattary men negizgi baǵyttary belgilenedi», - dedi ol.
Onyń aıtýynsha, kelisimde 10 negizgi mindet aıqyndalǵan. Bul rette teńestirilgen salyq-bıýdjet saıasaty tolyq Úkimettiń quzyretine jatady.
«Ulttyq bank tómen ınflıasııany qoldaýǵa, sondaı-aq eldiń ekonomıkalyq damýynyń ornyqtylyǵyn jáne halyqtyń ómir súrý deńgeıiniń ósýine basymdyq bere otyryp ınflıasııalyq targetteý rejımin saqtaıdy. Bul rette ınflıasııa boıynsha nysanaly baǵdar naqtylanady. 2021 jylǵa deıin 4-6 paıyz dálizin saqtaý, al 2022 jyldan bastap ony 3-5% deıin tómendetý jáne uzaq merzimdi perspektıvada osy dálizde saqtaý usynylady», - dedi UB basshysy.
E.Dosaevtyń aıtýynsha, Ulttyq bank bazalyq stavka deńgeıin naqty kórsetkishte oń bolatyn 3-3,5 paıyz sheginde qoldaýǵa umtylatyn bolady.
«Inflıasııalyq prosester kúsheıgen jáne ınflıasııanyń belgilengen nysanaly dálizden asý táýekelderi artqan kezde aqsha-kredıt saıasaty qatańdatylýy múmkin», - dedi ol.