26 jyl buryn, 1994 jyly sol kezdegi Joǵary Keńestiń sessııasynda Elbasy N.Nazarbaev Qazaqstannyń astanasyn Almatydan Aqmolaǵa aýystyrý jónindegi ıdeıasyn jarııa etken kezde bul ıdeıaǵa senbegender kóp boldy.
Úmitten góri kúdik basym bolatyn. Ekonomıkalyq baılanystar úzilip, kásiporyndar jabylyp, jumyssyzdyq kóbeıgen ýaqytta, aılap aılyq, jyldap jalaqy tólenbeı turǵan kezde astanany kóshirý eshqandaı sanaǵa syımaıtyn dúnıe bolyp kórinetin. Biraq kóp uzamaı munyń uly ıdeıa ekenine kózimiz jetti. Esildiń oń jaǵalaýyndaǵy eski qala adam tanymastaı ózgerdi. Sol jaǵalaýda álemdegi ozyq sáýlettik úlgidegi ǵımarattar boı kórsete bastady. Astananyń qurylysy el ekonomıkasyna úlken serpin berdi. О́ndiristi damytýdyń, qurylys pen qurylys ındýstrııasyn órkendetýdiń lokomotıvine aınaldy. Elordaǵa qarap oblys ortalyqtary boı túzedi. Aýdan ortalyqtary kórkeıe tústi. Aınaldyrǵan 20 jyldyń kóleminde Qazaqstan astanasy álemniń jaýharyna aınaldy. Saryarqanyń sary dalasyna Astana daıyn kúıde túse salǵan syı sııaqty kórindi. Sonyń artynda qanshama eńbek pen erlik turǵanyn, kúlkisiz kúnder men uıqysyz túnder ótkenin bireý bilse, bireý bile bermeıdi. Sondyqtan bolsa kerek, biz túk bolmaǵandaı bas qalanyń jańa ataýyna baılanysty túrli oı-pikir aıtyp jatamyz. Ol da durys shyǵar. Demokratııalyq memleket quryp jatqannan keıin oı plıýralızminiń bolǵany da ońdy. Bul álemde bolyp jatqan úrdis. Biraq bizdiń óz dástúrimiz, saltymyz bar. Bizdiń eń úlken qundylyǵymyz – birlik pen yntymaq. Biz azamatymyzdy ardaqtap, urpaǵymyzdy qundaqtaı bilgen halyqpyz. Osy turǵydan alǵanda Elbasynyń táýelsiz memleket turǵyzýdaǵy sheksiz eńbegin, tarıhı rólin baǵalaǵan keshegi saıası ózgerister men qabyldanǵan tarıhı sheshimder memleketimizdiń, halqymyzdyń órkenıettiligin kórsetti. Osy arqyly Qazaqstan halqy qaı kezeńde bolsa da pendeshilikten, alaýyzdyqtan, arandatýshylyqtan shet turatynyn dáleldedi. Bul shynynda qaı memleket bolsyn, jetýdi maqsat tutatyn shynar bıigi. Soǵan elimiz jetip otyr. Qazaqstandyqtardyń basym kópshiligi astananyń Nur-Sultan dep atalýyna qoldaý kórsetýde. Nur-Sultan ataýy astanamyzdy odan ári bıiktete túsetinine esh kúmán joq. Álemde Nursultan men Qazaqstan egiz uǵym sanalady. N.Nazarbaevty halyqaralyq deńgeıdegi reformator, beıbitshilik bastamalary men ıdeıalardyń avtory, ıadrolyq qarýsyz álem ıdeıasynyń bastaýshysy, táýelsiz memleket qurýdyń arhıtektory retinde moıyndaǵan alpaýyt elderdiń basshylary da, iri ınvestorlar da Qazaqstanǵa úlken senimmen qaraıtynyna eshqandaı kúmán joq. Osynyń barlyǵyna «táýbe» degimiz keledi.
Álı BEKTAEV,
«Aýyl» halyqtyq-demokratııalyq patrıottyq partııasynyń tóraǵasy,
Senat depýtaty