Aqtóbedegi Qazaqstan halqy Assambleıasynyń ǵımaratynda elordanyń Nur-Sultan ataýyna qoldaý kórsetýge arnalǵan jıyn ótti. Jıynǵa oblystyq máslıhat depýtaty, Aqtóbe aýyl sharýashylyǵy kolledjiniń dırektory Amangeldi Esirkepov, «Aqtóbe» fýtbol klýbynyń bas dırektory Samat Smaqov, «Er-Baqyt» sporttyq-patrıottyq klýby» qoǵamdyq uıymynyń tóraǵasy, aýǵan soǵysynyń ardageri Marat Qoılybaev, kásipker, Aqtóbe oblysynyń isker áıelder qaýymdastyǵynyń múshesi Altynaı Muhanova, «Nur Otan» partııasy oblystyq fılıaly «Jas Otan» jastar qanatynyń tóraǵasy Asyljan Búrkitalın qatysyp, elordaǵa Nur-Sultan ataýynyń berilýine baılanysty óz oılarymen bólisti.
«Biz, ǵasyrlar toǵysynda dúnıe esigin ashqan jas urpaq, shyn máninde baqyttymyz! Táýelsiz elde tulǵa bolyp damýǵa barlyq jaǵdaı jasaldy. Qazir elimizdegi balalar mektepke deıingi, mekteptegi bilimmen tolyq qamtylǵan. Mektep túlekterine alǵashqy kásip ıgerý úshin tegin kásiptik bilim de beriledi. Joǵary oqý oryndarynda jyl saıyn bólinetin granttar sany da ulǵaıyp keledi. Álemniń kez kelgen úzdik oqý oryndarynda tegin bilim alýǵa múmkindik beretin «Bolashaq» baǵdarlamasymen 10 myńnan astam jas biliktiligin arttyrdy.
Kóptegen zamandastarymyz memlekettik qoldaýdyń nátıjesinde jańadan óz kásipterin ashty. Jas memleketimiz de ósti. 30 jylǵa jýyq ýaqyt ishinde Qazaqstan álemdegi kez kelgen memleketpen terezesi teń dárejege jetti. Elimiz EQYU men Islam elderi konferensııasynda tóraǵalyq etti, álemdik deńgeıdegi EKSPO kórmesin ótkizdi, Sırııa ahýalyn sheshýde mańyzdy rólge ıe boldy. Álemniń básekege qabiletti aldyńǵy qatarly 50 memleketiniń qataryna kirdi. Bul jetistiktiń eki sebebi bar. Ol talaı qıyndyq bolsa da moıymaı, jasymaı ótken qazaq halqy jáne halyqty basqarǵan tuńǵysh Prezıdent Nursultan Nazarbaev. Dáýirler toǵysynda tutas memleketti aıaǵyna turǵyzǵan tulǵa, astanany ǵana emes, eldi qaıta qurǵan azamatqa elordanyń ataýyn berý tarıhı zańdylyq. Aqtóbelik jastar Astana qalasy ataýynyń ózgerýin qoldaıdy», dedi «Jas Otan» Jastar qanaty Aqtóbe oblystyq fılıalynyń tóraǵasy Asyljan Búrkitalın.