Qazaqstannyń tanymal opera ánshisi Aıgúl Shamshıdenova Venada 2019 jyldyń 8 sáýir kúni Avstrııadaǵy Bas bank salonynyń ataqty Barokko zalynda jeke konsertin beredi. Búginde Shamshıdenova – Venadaǵy Mahler fılarmonııasynyń jetekshi solısi, sondaı-aq álemniń ártúrli elinde talantyn joǵary deńgeıde baǵalaıtyn, Avstrııadaǵy Qazaqstannan shyqqan jalǵyz opera ánshisi.
27 jastaǵy Aıgúl – dramalyq koloratýralyq soprano ıesi. Ol Taldyqorǵanda dúnıege kelip, Almatydaǵy Jánııa Áýbákirovanyń mektep-kolledjinde oqydy. Vena konservatorııasyn támamdady. Shamshıdenova bala kezinen án aıtty, ulaǵatty ustaz, Qazaq KSR eńbegi sińgen artısi, professor, aty ańyzǵa aınalǵan Nadııa Abdrahmanova Sharıpovadan tálim aldy. Tanymal Elena Obrazsovanyń shákirti. 2004 jyly 13 jasynda Aıgúldiń erekshe daýysy Gollıvýdta 4 altyn medalmen jáne án oryndaýshylardyń búkilálemdik baıqaýynyń gran-prıimen marapattaldy. Al 15 jasynda Sankt-Peterbordaǵy Elena Obrazsovanyń halyqaralyq baıqaýynda laýreat atandy.
Búginde Aıgúl Venadaǵy Mahler fılarmonııasynyń jetekshi solısi ári Vena konservatorııasynda magıstr dárejesi boıynsha bilim alyp jatyr. Sondaı-aq qazaqstandyq ánshi Vashıngtondaǵy Qazaq-Amerıka qaýymdastyǵynyń múshesi. Shamshıdenova Sankt-Peterbordaǵy Marıın teatrynyń jas opera ánshiler Akademııasynda ári bilim alyp, ári óner kórsetti. Ol aty álemge áıgili maestronyń jetekshiligimen án shyrqady, Elena Obrazsova, Larısa Gergıeva, Natalı Desseı, Larısa Rýdakova syndy tanymal mýzykant jáne opera ánshilerimen birge joǵary kásibı deńgeıdegi sheberlik synyptarynan ótti.
Shamshıdenovanyń Venadaǵy konsertine álemniń túkpir-túkpirinen onyń ónerin joǵary baǵalaıtyn, súıip tyńdatyn, talǵamy bıik kórermender jınalady. Kóptegen tanymal ártister basqa álemdik sahnalarǵa dál osy Avstrııa Banki salonyndaǵy Barokko zalynan keıin ǵana óner kórsete bastaıdy. Dál sol jerde ortasha quny 180 000 eýrodan asatyn eń qymbat ári tańdaýly Fazilio roıali tur. Bul ataqty roıaldi eń daryndy, kemeńger jandarǵa arnalǵan dep jatady. Reseıde bul aspapty «Gazprom» kompanııasy satyp alyp, Mýzyka Úıine syıǵa tartqan.
«Men úshin klassıkalyq mýzykanyń álemdik astanasy – Venada jeke kosertimdi ótkizý – zor baqyt, biregeı múmkindik, qaıtalanbas aıryqsha oqıǵa,- deıdi Aıgúl Shamshıdenova. – Buǵan deıin tap osy roıaldiń súımeldeýimen bir ret óner kórsetkenmin. Bul – ǵajap sezim! Al osy joly konsertimniń mereıli meımany – Shveısarııanyń opera ánshisi Elızabet Sısı Malermen birge án aıtatynyma tolqyp ta, erekshe qýanyp ta otyrmyn».
Elızabet Sısı Maler «Karnegı Holl», Sıýrıhtaǵy Vienna Konzerthaus, Zalsbýrg, Nıýrnberg, Hıýston, Nıý-Iorktaǵy álemdik sahnalarda óner kórsetedi. Onyń konsertteri álemdik basty telearnalardan kórsetilip, tanymal radıolardan taratylady. Qazaqstan-Shveısarııa ánshileriniń ádemi ári áýezdi úılesimi kásibı mamandardyń erekshe qyzyǵýshylyǵyn týǵyzýda.
Konsertte álemniń ozyq týyndylary oryndalady: Rossını, Bellını, Donısettı, Verdı, Sharpantenyń úzdik shyǵarmalary bar. Shamshıdenova avstrııalyq jáne shveısarııalyq opera teatrynyń dırektorlaryn da qyzyqtyra bildi, sebebi, mundaı repertýarmen óner kórsetý álemde tek biregeılerdiń qolynan keledi.
Aıgúl Shamshıdenovanyń Venadaǵy konsertiniń quny – 60-80 eýro. Osydan keıin ánshi 21 sáýirde «Qazaqstannyń 100 jańa esimi» jobasynyń jeńimpazy, Qazaqstannyń jalǵyz kontr-tenory Batyrjan Smaqovpen birge «Astana Opera»-da konsert beredi.
Aıgúl AHANBAIQYZY,
«Egemen Qazaqstan»
ALMATY