Olımpıadaǵa Qazaqstannyń barlyq aımaqtarynan 9-11 synyptyń 663 oqýshysy jınalǵan. Bilim dodasynyń qorytyndysy 29 naýryzda belgili bolady. Bul týraly Qyzylorda oblysy ákimdiginiń baspasóz qyzmeti habarlady.
N.Bekejanov atyndaǵy Qyzylorda oblystyq mýzykalyq-drama teatrynda jalpy bilim beretin pánder boıynsha respýblıkalyq olımpıadanyń ashylý saltanaty ótti.
Oblys ákimi Q.Kósherbaev olımpıada qatysýshylarymen kezdesip, «jastardyń bilimi, biliktiligi men daǵdylary – barsha ulttyń eń mańyzdy ári qymbat resýrsy» ekenin atap ótti.
«Joǵary bilikti mamandar daıarlaý máselesinde bilim berý sapasynyń deńgeıin kóterýge tıispiz. Oblystyń sala qyzmetkerleri mektep túlekteriniń kem degende 50% JOO túsirýge qol jetkizýi tıis. Biz jyl saıyn az qamtylǵan jáne kópbalaly otbasylardan shyqqan balalardy eńbek resýrstarynyń teńgerimine sáıkes óńirde suranysqa ıe mamandyqtar boıynsha oblys ákiminiń granty esebinen elimizdiń jetekshi joǵary oqý oryndaryna oqýǵa jiberemiz. Bıyl atalmysh grant sany 2 esege – 100-den 205-ke deıin artty. Osylaısha, búgingi tańda mundaı grant ıegerleriniń sany 900-ge jetti. Aıta ketý kerek, aǵymdaǵy jyldan bastap oblys ákimi granttarynyń 70% IT-mamandyqtarǵa baǵyttalady», dedi aımaq basshysy.
Sonymen qatar 2014 jyldan bastap aımaqtyń mektep túlekteri Máskeý men Sankt-Peterbýrgtiń úzdik tehnıkalyq JOO bilim alýda. Alǵashqy túlekter ótken jyldan bastap óńirdegi kásiporyndarda jumys istep, keıbiri magıstratýrada oqýlaryn jalǵastyrýda. Aıta keterligi, ekinshi jyl qatarynan oblystaǵy mektep túlekteriniń 97% joǵary oqý oryndary men kolledjderge túsken, olardyń 58% memlekettik grantqa ıe boldy.
Sondaı-aq oblys basshysy bilim berý salasyna qatysty birqatar josparlarymen bólisti.
«Endi bizdiń mindetimiz - jastardy «Lıga plıýsha» ýnıversıtetterinde oqytýǵa qol jetkizý. Eger aıqyn maqsatty mejelep, naqty mindetter qoıylmasa, esh nársege jetý múmkin emes! Tehnologııalardy qurý jáne paıdalaný, áleýmettik belsendilik pen kásipkerlik, kommýnıkasııa men dızaın, sondaı-aq, mektep baǵdarlamasyna kirmeıtin ǵylym salalaryndaǵy daryndardy qoldaý maqsatynda Reseıdiń «Kvantorıýmdar» men «Sırıýstar» qurý boıynsha tájirıbesin zerdeleımiz. Olardyń tájirıbesin zerdelep, joǵary bilikti ınjener mamandardy daıarlaýǵa, ınnovasııalyq tehnologııalar men ıdeıalardy ázirleýge, testileýge jáne engizýge baǵyttalǵan tolyqqandy tehnoparkter qurǵymyz keledi», dep atap ótti oblys ákimi.