Qaraǵandylyqtar naýryzda akrobatıka jáne sambo boıynsha Álem kýbogyn utyp aldy. Bul týraly Qaraǵandy oblysy ákimdiginiń baspasóz qyzmeti habarlady.
Qazaqstan tarıhynda alǵash ret Álem kýbogynda sporttyq akrobatıka boıynsha erler juby jeńimpaz atandy. Las-Vegasta ótken halyqaralyq birinshilikte eresekter sanatynda Qazaqstannyń namysyn eki qaraǵandylyq sportshylar - Vadım Shýlıar men Danıel Dıl qorǵady. Atalmysh juptyń negizgi qarsylastary Germanııa jáne Ulybrıtanııa sportshylary boldy. Jalpy saıysqa 18 elden jınalǵan akrobattar qatysty.
Aıta ketý kerek, akrobattar tek Álem kýbogynyń ıegerleri ǵana atanyp qoımaı, halyqaralyq sanattaǵy sport sheberleri dárejesin aldy.
Qazaqstan qorjynyna ekinshi kýbokti samboshy Ibragım Baǵlan alyp keldi. Ol júldeni sportshy halyqaralyq saıys – Máskeýde ótken «Harlampıev Memorıaly» Álem kýbogynda utyp aldy. Ibragım Baǵlan 52 keli salmaq dárejesinde óner kórsetti. Týrnırge 33 eldiń sportshylary qatysty.