Qazaqstan Respýblıkasy Prezıdenti Ákimshiliginiń kelisimimen jáne Túrkistan oblysynyń ákimi О́.Shókeevtiń ókimimen Túrkistan oblysy ákiminiń orynbasary bolyp Amanbaev Joldymurat Ermuhanuly taǵaıyndaldy. Bul týraly Túrkistan oblysy ákiminiń baspasóz qyzmeti habaralady.
Joldymurat Ermuhanuly 1957 jyly 4 qazanda Aqtóbe oblysynda dúnıege kelgen.
Almaty aýyl sharýashylyǵy ınstıtýtynyń ekonomıka fakýltetin úzdik bitirgen.
Eńbek jolyn 1974 jyly Aqtóbe oblysynda Ýrkachev sovhozynyń №1 fermasynda jumysshy bolyp bastaǵan.
1979-2018 jyldary QazSSR Memlekettik josparlaý janyndaǵy Josparlaý jáne normatıvtik ǵylymı-zertteý ekonomıkalyq ınstıtýtynyń ekonomısti, Almaty qalasynda Jambyl aýdandyq qarjy bóliminiń aǵa ekonomısti, Aqtóbe oblysy Muǵaljar aýdandyq qarjy bólimi meńgerýshisiniń orynbasary – memlekettik kiris ınspeksııasynyń bastyǵy, Aqtóbe oblysy boıynsha salyq basqarmasynda bólimi bastyǵy, bastyǵynyń orynbasary, Aqtóbe qalasy boıynsha memlekettik salyq ınspeksııasynyń basshysy, Qazaqstan Respýblıkasy Qarjy mınıstrligi Bıýdjet departamentinde bólim bastyǵy, Qazaqstan Respýblıkasy Memlekettik kiris mınıstrligi Salyq tóleýshilermen jumys departamentinde bólim bastyǵy, Aqtóbe oblystyq qazynashylyq, qarjy basqarmalardyń bastyǵy, Astana qalasy Qarjy departamenti basshysynyń orynbasary, Astana qalasynyń ákimdigi Astana qalalyq ekonomıka jáne bıýdjettik josparlaý departamentiniń dırektory, Ońtústik Qazaqstan oblysy ekonomıka jáne bıýdjettik josparlaý departamentiniń dırektory, Qazaqstan Respýblıkasy Premer-Mınıstri orynbasarynyń keńesshisi, «QazAgro» ulttyq basqarýshy holdıngi» AQ basqarýshy dırektory, Qazaqstan Respýblıkasy Aýyl sharýashylyǵy mınıstrligi Ákimshilik qamtamasyz etý departamentiniń dırektory, «Qazagromarketıng» AQ basqarma tóraǵysynyń orynbasary, Qazaqstan Respýblıkasy Aýyl sharýashylyǵy mınıstriniń kómekshisi bolyp qyzmet jasaǵan.
2012 jyly Qurmet ordenimen marapattaldy.
2018 jyldyń qańtar aıynan búgingi kúnge deıin Qazaqstan Respýblıkasy Aýyl sharýashylyǵy mınıstrligi Kadr jáne ákimshilik qamtamasyz etý departamentiniń dırektory laýazymynda qyzmet atqaryp keldi.