Nur-Sultan qalasyndaǵy Beıbitshilik jáne kelisim saraıynda QHA aktıviniń astananyń ataýy ózgertilýin qoldaýǵa arnalǵan jıyn ótti, dep habarlady Qazaqstan halqy Assambleıasynyń resmı saıty.
Jıynǵa Qazaqstan halqy Assambleıasy Tóraǵasyn+yń orynbasary – Hatshylyq meńgerýshisi Janseıit Túımebaev, Qazaqstan halqy Assambleıasynyń músheleri, etnomádenı birlestikterdiń, Ǵylymı-sarapshylyq keńestiń, Qoǵamdyq kelisim keńesiniń, Analar keńesiniń, «Jańǵyrý joly» respýblıkalyq jastar qozǵalysynyń ókilderi qatysty.
Astanaǵa Qazaqstannyń Tuńǵysh Prezıdentiniń esimi berilýi – Elbasynyń táýelsiz Qazaqstandy qurýdaǵy orasan zor eńbegin moıyndap, taný ekendigin atap aıtqan Janseıit Túımebaev: «Naýryz aıy – jańa jyldy elordamyz tarıhı Nur-Sultan
ataýymen bastap otyr. El bastaǵan ulylardyń esimin ulyqtaý – álemdik órkenıette ejelden kele jatqan úrdis. Al Qazaqstannyń sol álemdik órkenıet kerýenine teń quqyly memleket retinde qosylyp, kók baıraǵyn jelbiretken, BUU múshe bolǵan jáne Qazaqstan halqy Assambleıasyn qurǵan Tuńǵysh Prezıdentimizdiń atyn eldiń astanasyna bergenimizdi – Qazaqstan halqynyń Elbasyna degen alǵysy dep bilemiz», dedi.
Ol sonymen qatar QHA músheleri, etnomádenı birlestikterdiń ókilderi, QHA Ǵylymı-saraptamalyq keńesi, QHA kafedrasynyń qaýymdastyǵy, Qoǵamdyq kelisim keńesi, Analar keńesi, QHA jýrnalıster klýby, Medıatorlar keńesi, Kásipkerler qaýymdastyǵy, «Jańǵyrý joly» jastar qozǵalysy músheleri astanaǵa Qazaqstannyń Tuńǵysh Prezıdentiniń esimi berilýin qoldaıtynyn atap ótti.
«Biz astanaǵa Nur-Sultan ataýy berilýin tolyqtaı qoldaımyz. Bul qadam Elbasynyń táýelsiz Qazaqstandy qurýdaǵy eren eńbegin baǵalaý úshin jasalyp otyr. Astanany kóshirý – Nursultan Ábishuly Nazarbaevtyń strategııalyq jobasy jáne bastamasy bolyp tabylady. Elbasy elimizdiń tarıhynyń jańa paraǵyn ashty. Búginde astanaǵa Qazaqstannyń Tuńǵysh Prezıdentiniń esimin berý – bar álemge nyshandy belgi bolmaq. Qazaqstannyń egemendi, demokratııalyq, quqyqtyq jáne áleýmettik memleket retinde damýyndaǵy Nursultan Nazarbaevtyń baǵytynyń ózgermeıtindigi men sabaqtastyǵy týraly belgi. Saıası kóshbasshylyqtyń jáne saıası erik-jigerdiń arqasynda Elbasy halyqaralyq qatynastardyń joǵary adamgershilik standarttaryn qurdy. Ol elimizdiń beıbitsúıgish kópvektorly syrtqy saıasatyn damytýǵa qosqan úlesi úshin halyqaralyq qoǵamdastyqtyń zor qurmeti men alǵysyna ıe boldy», dedi QHA hatshylyǵynyń meńgerýshisi.
QHA Tóraǵasynyń orynbasary atap ótkendeı, Nursultan Nazarbaevtyń tarıhı eńbegi Uly dala eliniń keıingi urpaqtary úshin úlgi bolýy tıis.
Ol zamanaýı Qazaqstannyń qalyptasýyndaǵy onyń rólin, ótpeli kezeńdegi qıyndyqtardy jeńýdegi jáne jańa astanany qurýdaǵy eńbegin erekshe atap ótti.
«Bul – erkindik pen táýelsizdik murattaryna berilgen halyqqa sheksiz qyzmet etý úlgisi», dedi Assambleıa Tóraǵasynyń orynbasary.
Janseıit Túımebaev astananyń ataýyn Tuńǵysh Prezıdenttiń esimine ózgertý – bizdiń azamattyq boryshymyz ekenin, sonymen qatar Nur-Sultan ataýy kıeli qazaq jerinde birlik, beıbitshilik pen gúldenýdiń nyshany bolyp saqtalýy úshin barlyǵyn jasaýǵa tıis ekenimizdi jetkizdi.