Sý dobynan Avstralııanyń Pert qalasynda ótip jatqan Álem lıgasynyń irikteý týrnıriniń ekinshi kezdesýinde Qazaqstannyń erler quramasy Argentınamen sheberlik baıqasty.
Alǵashqy kezeńde qos komandanyń qaqpasyna bir-bir ǵana doptan engen bolsa, odan keıingi ýaqytta jerlesterimizdiń ústemdigi esh kúmán týǵyzǵan joq. Qalǵan úsh kezeńde erkin oıqastap, basymdyq tanytqan jigitterimiz aıqyn jeńiske qol jetkizdi. Esep – 11:5.
Esterińizge sala keteıik, osy týrnırdiń tusaýkeser básekesinde de bizdiń jigitter óz jankúıerlerin qýantqan edi. Jańa Zelandııaǵa qarsy ótken sol kezdesý 11:10 esebimen aıaqtaldy.
Aıtýly eki birdeı jeńisten keıin alty upaıdy qorjynǵa salǵan Qazaqstannyń vaterpolshylary jarys kestesinde jeke-dara kósh bastap tur. Odan keıingi oryndarǵa Qytaı (4 upaı), Argentına (2 upaı) jáne Jańa Zelandııa (0 upaı) quramalary jaıǵasty.
Ǵalym SÚLEIMEN,
«Egemen Qazaqstan»