Búgin elordada Qazaq ulttyq horeografııa akademııasynyń uıymdastyrýymen Shara Jıenqulova atyndaǵy V Respýblıkalyq qazaq bıi baıqaýynyń saltanatty ashylý rásimi ótti.
Ashylý saltanatynda Qazaqstan Respýblıkasynyń Mádenıet jáne sport mınıstri Arystanbek Muhamedıuly baıqaý qatysýshylaryna sáttilik tileı otyryp, mádenıet salasynyń qyzmetkerlerin Halyqaralyq teatr kúnimen quttyqtady.
«Biz qazir tarıhı ýaqytta ómir súremiz. Táýelsizdik jyldary Qazaqstannyń mádenıet salasy úlken bıikterge qol jetkizdi. Bizdiń ártister men ujymdar álemniń úzdik teatrlarynda óner kórsetedi. Jekelegen daryndarymyzdy barsha álem moıyndap, qurmet tutady», dep atap ótti Arystanbek Muhamedıuly.
Besinshi mereıtoılyq baıqaýǵa óńirlerden 150-den astam qatysýshy keldi. Olar «Ansamblder», «Jeke oryndaý», «Baletmeısterlik óner» nomınasııalary boıynsha jarysqa túsedi. Dástúrli baıqaý qazaq estradalyq jáne halyqtyq bı salasyndaǵy talantty bıshilerdi, baletmeısterler men pedagogtardy anyqtaýǵa baǵyttalǵan. Baıqaý kásibı ujymdar, joǵary oqý oryndarynyń horeografııa fakýltetteri men kafedralarynyń ansamblderi arasynda ótedi.
Shara aımaqtyq ansamblderdiń repertýarymen, horeograftardyń jańa izdenisterimen tanysýǵa, jarqyn oryndaýshylardy anyqtaýǵa, qatysýshylarǵa qazaq bıi salasyndaǵy shyǵarmashylyq jetistikterimen, kásibı tájirıbemen jáne bilimmen ózara almasýǵa múmkindik beredi.
Sondaı-aq ashylý saltanatyna qazaq bıi óneriniń maıtalmandary, otandyq jáne sheteldik arnaıy shaqyrylǵan qonaqtar, baıqaý qatysýshylary men jetekshileri qatysty.
Úsh kúnge sozylatyn baıqaýda qatysýshylar úshin qazaq bıiniń jetekshi pedagogtarynyń sheberlik synyptary, «Qazaq bıi» derekti fılmi, Qazaq KSR eńbek sińirgen ártisi, professor Toıǵan Izimniń jeke kolleksııasynan sahnalyq kostıýmder kórmesi jáne Qazaq ulttyq horeografııa akademııasynyń Qazaq bıi zerthanasynyń tusaýkeseri ótedi. Jeńimpazdar 29 naýryz kúni «Astana Balet» teatrynda ótetin gala-konsertte jarııalanady.
Shara Jıenqulova atyndaǵy baıqaý alǵash ret 1992 jyly A.V. Seleznev atyndaǵy Almaty horeografııalyq ýchılıshesinde ótti. II jáne III baıqaýlardy Oral qalasynda (2001, 2006) M. О́temisov atyndaǵy Batys Qazaqstan memlekettik ýnıversıteti ótkizdi, al 2012 jyly Qazaq ulttyq óner ýnıversıtetiniń uıymdastyrýymen ótken baıqaý Shara Jıenqulovanyń 100-jyldyǵyna arnaldy. Bıylǵy Shara Jıenqulova atyndaǵy V Respýblıkalyq qazaq bıi baıqaýynyń quryltaıshysy men uıymdastyrýshysy – Qazaq ulttyq horeografııa akademııasy.