Qazaqstan Respýblıkasynyń Tuńǵysh Prezıdenti Nursultan Nazarbaevtyń halqyna Úndeý jarııalap, óz erkimen prezıdenttik quzyretin toqtatýy tarıhtyń qoınaýyna engen mańyzy joǵary, máni tereń aıtýly oqıǵa ekeni anyq.
Eldiń áleýmettik-ekonomıkalyq órkendeýin, halqynyń baıandy baqytyn oılaǵan Nursultan Ábishulynyń kemel saıasatynyń arqasynda búgingideı jetistikke qol jetkizdik. Bul oraıda atqarǵan eńbegi orasan. Senim bıiginen kóringen tulǵanyń bılik basyndaǵy basshylarǵa durys jol kórsetýi – ábden quptarlyq is. Kópti kórgen adam retinde onyń tańdaýyna eshqandaı kúmán bolmaýy tıis ekenin basa aıtqym keledi. Kóregen basshy, suńǵyla saıasatker, qarymdy qaıratkerge elimizdiń ár azamatynyń qurmeti eshqashan ortaımaıdy. Damyǵan otyz eldiń qataryna qosylý úshin onyń bastamasymen elimizde qolǵa alynǵan baǵdarlamalar, strategııalyq josparlar sátti júzege asyp keledi. Oǵan úles qosý – bárimizdiń mindetimiz.
Parlament otyrysynda Qazaqstan Prezıdenti Qasym-Jomart Toqaevtyń Astana qalasynyń ataýyn Nur-Sultan dep ózgertý týraly usynysyn soltústikqazaqstandyqtar da biraýyzdan qoldady. Kezinde astanany Arqanyń tósine aýystyrý tosyn oqıǵadaı áser etkeni bárimizdiń esimizde. Kóbimiz memleket aýqymynan tys, oıǵa syımaıtyndaı usynys retinde qabyldaǵanymyz ras. Qazir qarap otyrsam, astanany kóshirý prosesi tutas dáýirlik epopeıa ispettes. Jańa elordanyń jylnamasyn, tarıhı shejiresin Elbasy uǵymynan bóle-jarý múmkin emes. Az ǵana ýaqyttyń ishinde sáýlet óneriniń jaýhar týyndysyna aınalyp,úzdik úlgidegi rýhanı, mádenı shaharlarmen teńesti. Erke Esildiń jaǵasynda boı kótergen ásem astanamyzǵa Elbasy esiminiń berilýi zańdylyq der edim. Budan bylaı oblys ortalyǵyndaǵy eń uzyn kóshelerdiń biri de Elbasy esimimen atalady.
Halqymyzdyń basty baılyǵy – táýelsizdigi. Ata-babalarymyz ǵasyrlar boıy armandap kelgen egemendikke qol jetkizgen Nursultan Ábishulyn qalaı ulyqtasaq ta jarasady. Sonyń biregeıi – elorda endi Nur-Sultan dep atalǵanyna bek qýanyshtymyz.
Eskendir ELEÝSIZOV,
oblystyq Ardagerler keńesiniń tóraǵasy
Soltústik Qazaqstan oblysy