Hadısha Bókeeva atyndaǵy Batys Qazaqstan oblystyq qazaq drama teatrynda aqyn Farıza Ońǵarsynovanyń shyǵarmashylyǵyna arnalǵan «Aıalap ótem...» atty poetıkalyq fentezıdiń premerasy ótti.
Teatrdyń ádebıet bólimi meńgerýshisi Nurlan Sádir men Mádenıet salasynyń úzdigi, osy ujymda kóp jyl qyzmet etken tájirıbeli ártis Nurlygúl Jubatovanyń qalamynan týǵan jańa týyndyda aqyn beınesi birneshe qyrynan ashylǵan. Názikjandy aqynnyń lırıkalyq beınesi birde órshil kúreskerge aınalyp, Mahambet rýhymen tildesedi. Birde saıasatqa aralasqan qaıratkerligi de kórinedi.
– Farıza apaı Parlament depýtaty bolǵan kezinde «Qazaqstan Respýblıkasyndaǵy ana men balany qorǵaý týraly» zań jobasyn daıyndaǵan eken. «Neke jáne otbasy týraly» zańdy ázirleýge de atsalysqan. Qoıylymda aqynnyń halyq qalaýlysy retinde atqarǵan osy isterin de kórsetip óttik. Bir qyzyǵy, bul qoıylymnyń ssenarııi budan birneshe aı buryn daıyndaldy ǵoı. Odan keıin elimizde bolǵan ózgerister, ásirese kóp balaly, az qamtylǵan otbasylardy qoldaýǵa baǵyttalǵan sharalar qolǵa alynǵan tusta sahnadaǵy Farıza apaıdyń ana men balany qorǵaýǵa qatysty is-áreketi óte erekshe qabyldanady eken. Qoıylymnyń osy tusynda kórermen eriksiz qol shapalaqtap otyrdy, – deıdi Nurlan Sádir.
Bul qoıylym – Nurlygúl Jubatovanyń rejısser retindegi tuńǵysh jumysy. Sýretshisi Murat Mámbetov te «О́ner salasynyń úzdigi» atanǵan jas ónerpaz. Sahnanyń bezendirilýi, dekorasııa men bı qoıylymdary aqyn óleńderimen úndesip, ádemi garmonııa qurady. Onyń ústine basty róldi somdaǵan Qazaqstannyń eńbek sińirgen qaıratkeri Gúljııan Shyntemir aqyn Farıza Ońǵarsynovanyń bitim-bolmysyn jan dúnıesinen shyǵaryp kórsete bildi. Aıta keteıik, ekinshi quramda basty róldi rejısser Nurlygúl Jubatovanyń ózi oınap shyqty. Kıeli sahnada poezııa patshalyǵy saltanat qurǵan áserli sát boldy.
– Janarynda jasyn oınap, túıdek-túıdek jyr aǵynyna shydaı almaı shıyrshyq atqan erekshe tulǵanyń osylaısha oralýynyń ózi bir dúnıe. Janry da ereksheleý. «Aıalap ótem...» degen atynan bastap qolmen ustap, kózben kórýge kelmeıtin, kelmeıtin emes-aý, qımaıtyn, tek júrekpen ǵana sezinýge bolatyn náziktik, qaısarlyq, rýx til qatty. О́leńmen órilgen, ádemi qııalmen astasqan aqyn ómiriniń beınesin kórdik, – deıdi aqyn, Qazaqstan Jazýshylar odaǵynyń múshesi Darıǵa Mushtanova premera týraly.
Qazbek QUTTYMURATULY,
«Egemen Qazaqstan»
Batys Qazaqstan oblysy