Áskerı tikushaq búgin keshke jaqyn Qyzylorda oblysynyń Jalaǵash aýdany aýmaǵynda qulaǵan dep habarlaıdy «Habar 24».
Bul týraly habar «112» qyzmetine saǵat 17:35-te tústi. Áýe kóligi túgi qalmaı janyp ketken. Apattyń sebebi ázirge belgisiz. Belgilisi, tikushaq elimizdiń Qorǵanys mınıstrligine tıesili. Osy mınıstrliktiń habarlaýynsha, áýe tehnıkasynyń bortynda 13 adam bolǵan. Buǵan deıin tótenshe jaǵdaılar qyzmeti qulaǵan MI-8 tikushaǵy dep habarlaǵan bolatyn.
Talǵat Muhtarov, Qorǵanys mınıstriniń orynbasary, general-leıtenant:
- Qorǵanys mınıstrligi Áskerı áýe kúshteriniń tikushaǵy apatqa ushyrady. Aldyn ala málimet boıynsha, opat bolǵandar bar. Qaza tapqandar men zardap shekkenderdiń sany men jaǵdaıy anyqtalý ústinde. 4 tikushaq Aqtaý qalasynan Shymkentke qaraı baǵyt alǵan. Ushý túngi ýaqytta meteorologııalyq qıyn jaǵdaıda keshendi tekseris jáne «Altyn jebe» arnaıy bólimsheleriniń jattyǵýy aıasynda iske asyrylǵan. Qorǵanys mınıstri, general-maıor Nurlan Ermekbaevtyń buıryǵymen Qorǵanys mınıstrliginiń arnaıy komıssııasy oqıǵa ornyna attandy. Qazirgi ýaqytta eki tikushaq Qyzylordaǵa qondy. Bireýi apat ornyna oraldy. Qorǵanys mınıstrligi men Ishki ister mınıstrligi birigip áýe apatynyń sebebi men mán-jaıyn anyqtaý úshin tıisti tergeý jumystaryn bastady.