Qaraǵandyda bireýler reper Vladıslav Fedotov degendi soqqyǵa jyǵyp, basyn jaryp ketti.
Reper keshkisin kóterińki kóńil kúıde úıine qaıtyp kele jatqanda, janyna toqtaı qalǵan «Lada» markaly avtokólikten túsken úsh jigit ony soqqyǵa jyqqan. Naqtyraq aıtqanda, temir qubyrmen basynan birneshe márte urǵylaǵan. Soqqynyń saldarynan reperdiń mıy shaıqalyp, basynan aýyr jaraqat alǵan. Qazir ol emhanaǵa qaralyp júr.
Zardap shegýshiniń tanystarynyń aıtýynsha, bul oqıǵanyń túp-tamyry Vladıslav Fedotovtyń shyǵarmashylyǵynda jatqan bolýy ábden múmkin. О́ıtkeni, jergilikti jastar arasynda Fuckyourfeel psevdonımimen tanymal 21 jasar reperdiń sońǵy battl-óleńderi qulaqqa túrpideı tıetin boǵaýyz sózderge toly bolǵan.
Qazirgi ýaqytta bul oqıǵaǵa qatysy bar kúdiktiler anyqtalyp, olardyń ústinen qylmystyq is qozǵalǵan.
Qaırat ÁBILDA,
«Egemen Qazaqstan»
Qaraǵandy