Bılikke qol jetkizý úshin aqyl, erik-jiger kerek. Al sol bılikten óz erkińmen ketý úshin batyldyq qajet. Osy oraıda, Nursultan Nazarbaev Qazaqstan halqy úshin danalyqtyń, jaýapty basqarýshynyń, sonymen birge batyldyqtyń sımvolyna aınalyp otyr.
Búginde qazaqstandyqtar ǵana emes, búkil álem jurtshylyǵy Nursultan Nazarbaevtyń jeke basynyń qasıetterin, egemendi Qazaqstannyń saıası júıesi negizderin jáne joǵarǵy bılikti ózgertýdiń mádenıeti men ozyq dástúrin qalyptastyrýdaǵy tarıhı rólin oń baǵalaýda.
Memleket basshysynyń óz erkimen ókilettiginen bas tartýy postkeńestik keńistikte alǵash ret bolyp otyr. Kóptegen elderde bıliktiń aýysýy kezinde kisi ólimi, tóńkeris nemese saılaýda jeńilis tabý oryn alady.
Muny Elsınniń tájirıbesimen salystyrýǵa bolmaıdy, óıtkeni onyń ornynan túsýi kezinde Reseıdiń birinshi prezıdentiniń reıtıngi eń az synı ólshemderden tómen boldy.
Elbasy prezıdenttik qyzmetin óziniń bıik bedelin saqtaı otyryp aıaqtady. Bul sózimizge halyq tarapynan buqaralyq aqparat quraldary men áleýmettik jeliler arqyly aıtylǵan pikirler dálel bola alady. Sondaı-aq týystarymyzdyń jáne áriptesterimizdiń táýelsiz elimizdiń negizin salýshy – Elbasy Nursultan Ábishuly Nazarbaevtyń jasaǵan barlyq isteri úshin alǵysyn aıtyp, onyń óz ókilettigin toqtatqanyna ókinishin bildirgen pikirlerin de kóptep estip jatyrmyz.
Tarıh, keler urpaq áli Nursultan Nazarbaevtyń eline jasaǵan qyzmetiniń, sondaı-aq prezıdenttik ókilettigin óz erkimen toqtatýynyń ádil baǵasyn beretin bolady. Ol bıliktiń eriksiz túrde aýysýynyń aldyn aldy. Elbasy óz bıligin toqtatýǵa daıyndyqpen keldi. Elbasy «maıdan qyl sýyrǵandaı» eptilikpen, barlyq prosedýralyq jáne konstıtýsııalyq talaptardy saqtap, prosestiń tazalyǵyn qamtamasyz ete otyryp óz sheshimin qabyldady. Ol osy qadamy arqyly urpaqqa úlgi-ónege qaldyrdy. Dáliregi, Elbasy urpaqqa Qazaqstanda aldaǵy ýaqytta bıliktiń aýystyrýdyń tıimdi jolyn, halyqtyń múddesin barynsha eskere otyryp júzege asyrý qajettigin ańǵartty.
Biz táýelsiz ómir súrýge úırenýimiz kerek. Saıası tańdaýǵa jaýapkershilikpen qaraǵan abzal. Bul oraıda depýtattar men prezıdentti saılaý, jergilikti bılik organdarymen syndarly dıalog júrgizý, bıýdjetti jáne damý baǵdarlamalaryn baqylaýdy júzege asyrý mańyzdy. Nursultan Nazarbaevtyń tıisti zańdardy alǵa jyljytý jáne bılik tarmaqtary arasyndaǵy ókilettikterdi bólý máselelerinde kóp úlgi kórsetti.
Bizge halqymyzdyń birligi men yntymaǵyn saqtaý asa mańyzdy. Bul oraıda qazaq halqy negizgi jaýapkershilikti óz moınyna alý kerek. Elbasymyz halyqty elimizdi saqtaýǵa, beıbitshilik pen birlikti nyǵaıtýǵa únemi shaqyryp keledi. Bizdiń birligimiz, tatýlyǵymyz baǵa jetpes qundylyǵymyz. Tynyshtyq pen tatýlyqty tý etkenimiz úshin halqymyzdy barlyq álem syılaıdy, qurmetteıdi ári dana, beıbitshilikti jaqtaıtyn ult retinde tanıdy.
Bıliktiń aýysýyna úreımen qaraýdyń qajeti joq. Elimizdiń jańa Prezıdenti Qasym-Jomart Toqaev Elbasy Nursultan Nazarbaevtyń senimdi serigi ári shákirti. Ol N.Nazarbaevtyń saıasatyn odan ári jalǵastyrady. Q.Toqaev óz ustazynyń ustanǵan baǵytyna senedi. Kóp vektorly syrtqy saıasatymyzdyń negizgi sáýletshileriniń biri retinde Q.Toqaev bizdiń óńirde óz múddeleri bar negizgi geosaıası oıynshylar arasyndaǵy teńgerimdi qamtamasyz etýdi senimdi túrde jalǵastyra alady.
Nursultan Nazarbaev elimizde amerıkashyl, qytaıshyl nemese reseıshil kóshbasshy bolmaýy qajettigin, Qazaqstandy memlekettik múddelerimizge saı qyzmet etetin, táýelsizdigimizge qurmetpen qaraıtyn tulǵanyń basqarǵanyn qalaıtynyn uqtyrdy.
Elimiz saıası damýdyń jańa kezeńine shyǵady. Aldymyzda prezıdenttik saılaý tur. Bul saılaýda jańa tulǵalar tanylady. Osy saıası naýqan halqymyz úshin úlken syn. Biz elimizdiń, ózimizdiń taǵdyrymyzǵa tikeleı áser etetin jaýapty tańdaý múmkindigine ıe bolamyz. Bul óz kezeginde bizdiń halqymyz úshin jetilý synaǵy bolmaq. Qalaı desek te, halyq osy saıası naýqanda óziniń durys tańdaýyn jasaıdy degen senim mol. Elimiz aman, jurtymyz tynysh bolsyn.
Talǵat QALIEV,
saıasattanýshy