Der kezinde qabyldanǵan sharalar shegirtkelerdiń taralý aımaǵyn ótken jylǵy 1,9 mln. gektardan aǵymdaǵy jyly boljanyp otyrǵan 950,4 myń gektarǵa deıin eki esege azaıtýǵa múmkindik berdi: FAO-nyń ǵylymı usynymdaryn eskere otyryp, óńdeýdiń jańa ádisteri qoldanylady.
«Jalpy, asa qaýipti organızmdermen zalaldanǵan alań 2016 jylǵy 5,1 mln. gektardan 2019 jyly 3,9 mln. gektarǵa deıin tómendedi, karantındik aramshóp sanalatyn tikenekti alqanyń taralý oshaqtary tolyǵymen joıyldy, amerıkalyq aq kóbelek, Komstok symyry, kalıfornııalyq qalqanshaly symyr jáne shyǵys jemis jemiri sııaqty birqatar karantındik obektilerdiń taralý alańy qysqardy», deıdi Aýyl sharýashylyǵy mınıstri Saparhan Omarov.
Mınıstrdiń aıtýynsha, Qazaqstan aýmaǵyn karantındik obektilerdiń enýi men taralýynan qorǵaý maqsatynda 2019 jyly 19 aqpanda Qyrǵyzstan aýmaǵynan qurma, alma, tuqymdyq jáne taǵamdyq kartop ákelýge tyıym salý arqyly ýaqytsha karantındik fıtosanıtarııalyq sharalar engizildi. О́zbekstan men Qyrǵyzstandaǵy áriptestermen Fıtosanıtarııalyq, karantındik baqylaý salasyndaǵy yntymaqtastyq jónindegi jol kartalaryna qol qoıyldy.
«2018 jyly Qytaıdyń Bas keden basqarmasymen Qazaqstannan Qytaıǵa jońyshqa, raps kúnjarasy, arpa jáne júgeri eksporttaýǵa qoıylatyn fıtosanıtarııalyq talaptarǵa qol qoıyldy, arpa men júgeri boıynsha 2 kásiporynǵa ınspeksııa júrgizildi, bul atalǵan ónimdi resmı túrde jetkize bastaýǵa múmkindik berdi», deıdi mınıstr.
Baıandamadaǵy derekterde kórsetilgendeı, 30-dan astam un tartatyn Qazaqstan kásiporyny jáne 105 astyq saqtaý kásiporny Qytaı tizimine qosyldy, bul astyq pen unnyń Qytaı naryǵyna eksportyn ulǵaıtýǵa múmkindik bermek.
«Elimizdiń veterınarııalyq jáne fıtosanıtarııalyq qyzmetteriniń belsendi jumysynyń arqasynda basqa elderdiń tizilimderine barlyǵy 2557 qazaqstandyq eksporttaýshy kásiporyn, onyń ishinde Eýrazııalyq ekonomıkalyq odaq tiziliminde 2212 otandyq kásiporyn engenin taǵy da atap ótý mańyzdy», dedi vedomstva basshysy.